കൊല്ലം : തോപ്പില് കടവിലെ പെട്രോള് പമ്പില് നിന്ന് പട്ടാപ്പകല് 2 ലക്ഷം രൂപ കവര്ന്നു. ചുവന്ന ടീഷര്ട്ട് ധരിച്ച യുവാവാണ് പമ്പിന്റെ ഓഫീസില് കയറി മേശയില് സൂക്ഷിച്ചിരുന്ന പണം കവര്ന്നത്. കഴിഞ്ഞ ദിവസം സ്കൂട്ടറില് വന്ന യുവാവ് പെട്രോള് ചോദിച്ചു. 50 രൂപയ്ക്ക് ജീവനക്കാര് പെട്രോള് വണ്ടിയില് നിറച്ചു. പൈസ ചോദിച്ചപ്പോള് യുവാവ് കൈ മലത്തി കാണിച്ചു. യുവാവിന്റെ കയ്യിലെ മൊബൈല്, പമ്പ് ജീവനക്കാര് വാങ്ങി വച്ചു. അടുത്ത ദിവസം ഉച്ചയോടെ ഇയാളെത്തി 50 രൂപ നല്കി മൊബൈല് തിരികെ വാങ്ങി മടങ്ങി.
അല്പ്പനേരം അവിടെ കറങ്ങി നടന്നു. പെട്രോള് പമ്പില് ജീവനക്കാര് കുറവായിരുന്നു. ഉള്ള ജീവനക്കാര് വണ്ടിക്ക് പെട്രോള് നല്കി കൊണ്ടിരുന്നു. ഈ സമയം യുവാവ് ഓഫീസില് കയറി എണ്ണി കെട്ടിവച്ചിരുന്ന നോട്ട് കെട്ട് എടുത്ത് സ്ഥലം വിടുകയായിരുന്നു. രണ്ട് ലക്ഷം രൂപയോളം ഉണ്ടായിരുന്നു എന്ന് പമ്പിലെ ജീവനക്കാര് പറഞ്ഞു. മോഷ്ടാവെത്തിയ ബൈക്കിന്റെ നമ്പര് പ്ലേറ്റ് മടക്കി വെക്കുകയും മുന് ഭാഗത്തെ നമ്പര് പ്ലേറ്റിലെ രണ്ട് നമ്പര് മായിച്ച നിലയിലുമായിരുന്നു.
