കണ്ണൂര് : കുടുംബത്തോടൊപ്പം ഓണം ആഘോഷിച്ച് മുഖ്യമന്ത്രി പിണറായി വിജയന്. പതിവു വേഷമായ വെള്ള മുണ്ടും ഷര്ട്ടും തന്നെയാണ് മുഖ്യമന്ത്രിയുടെ ഓണക്കോടി. എന്നാല് കുടുംബാംഗങ്ങളെല്ലാം വേഷവിധാനത്തില് ചുവപ്പ് കൊണ്ടുവന്നിട്ടുണ്ട്. കസവ് കരയുള്ള വെള്ളയും ചുവപ്പും നിറങ്ങള് ഇടകലര്ത്തിയാണ് വേഷം. ഭാര്യ കമല, മകള് വീണ, മകനായ വിവേക് കിരണ്, കൊച്ചുമകന് ഇഷാന്, മകളുടെ ഭര്ത്താവും പൊതുമരാമത്ത് മന്ത്രിയുമായ പി എ മുഹമ്മദ് റിയാസ് എന്നിവര്ക്കൊപ്പമുള്ള കുടുംബ ചിത്രവും ശ്രദ്ധേയമായി.
മുഹമ്മദ് റിയാസാണ് ചിത്രം ഫേസ്ബുക്കിലൂടെ പങ്കുവെച്ചത്. ചിത്രത്തിന് താഴെ ആശംസകളുമായി നിരവധി പേരാണ് എത്തുന്നത്. പി കെ ശ്രീമതി ടീച്ചര്, മുകേഷ് എം പി, എ കെ ശശീന്ദ്രന്, ടി വി രാജേഷ് തുടങ്ങിയവര് മുഖ്യമന്ത്രിക്കും കുടുംബത്തിനും ആശംസകളുമായി എത്തി. ഭേദചിന്തകള്ക്കതീതമായ മനുഷ്യമനസ്സുകളുടെ ഒരുമ വിളംബരം ചെയ്യുന്ന സങ്കല്പ്പമാണ് ഓണത്തിന്റേതെന്ന് മുഖ്യമന്ത്രി ഫേസ്ബുക്കില് കുറിച്ചു.
‘സമൃദ്ധിയുടെയും ഐശ്വര്യത്തിന്റെയും സമാധാനത്തിന്റെയും സ്വപ്നങ്ങളുടെ സാക്ഷാത്കാരമായാണ് മലയാളി ഓണത്തെ കാണുന്നത്. ഒരുവിധത്തിലുള്ള അസമത്വവും ഇല്ലാത്തതും മനുഷ്യരെല്ലാം തുല്യരായി പുലരേണ്ടതുമായ ഒരു കാലം ഉണ്ടായിരുന്നുവെന്ന് ഓണ സങ്കല്പ്പം നമ്മോടു പറയുന്നു. വരുംകാലത്ത് സമാനമായ ഒരു സാമൂഹ്യക്രമം സാധിച്ചെടുക്കുന്നതിനുള്ള ശ്രമങ്ങള്ക്ക് ഊര്ജ്ജം പകരുന്ന ചിന്തയാണിത്. ആ നിലക്ക് ഓണത്തെ ഉള്ക്കൊള്ളാനും എല്ലാ വേര്തിരിവുകള്ക്കുമതീതമായി ഒരുമിക്കാനും നമുക്ക് കഴിയണം. ഐശ്വര്യപൂര്ണമായ ഓണം ലോകത്തെവിടെയുമുള്ള മലയാളിക്ക് ഉണ്ടാവട്ടെ എന്ന് ഹൃദയപൂര്വ്വം ആശംസിക്കുന്നു’, മുഖ്യമന്ത്രി ഫേസ്ബുക്ക് പോസ്റ്റില് പറയുന്നു.
