കൊച്ചി : ആറ്റിങ്ങലില് മൊബൈല് ഫോണ് മോഷ്ടിച്ചെന്ന് ആരോപിച്ച് എട്ടുവയസുകാരിയെ പിങ്ക് പോലീസ് ഉദ്യോഗസ്ഥ പരസ്യമായി വിചാരണ ചെയ്ത സംഭവത്തില് നഷ്ടപരിഹാരം നല്കാനാകില്ലെന്ന് സര്ക്കാര്. പെണ്കുട്ടിക്ക് നഷ്ടപരിഹാരം നല്കണമെന്ന ഹൈക്കോടതിയുടെ ആവശ്യമാണ് സര്ക്കാര് തള്ളിയത്. ഇക്കാര്യം വ്യക്തമാക്കി സര്ക്കാര് ഹൈക്കോടതിയില് റിപ്പോര്ട്ട് നല്കി. കുട്ടിക്ക് നഷ്ടപരിഹാരം നല്കണമെന്ന് ജസ്റ്റീസ് ദേവന്രാമചന്ദ്രന്റെ ബെഞ്ച് ആണ് സര്ക്കാരിനോട് നിര്ദേശിച്ചിരുന്നത്. വലിയ മാനസിക പീഡനമാണ് പെണ്കുട്ടി നേരിടേണ്ടി വന്നതെന്ന് ചൂണ്ടിക്കാട്ടിയ കോടതി നമ്പി നാരായണന് കേസില് നഷ്ടപരിഹാരം നല്കിയ മാതൃകയില് പെണ്കുട്ടിക്ക് നഷ്ടപരിഹാരം നല്കണമെന്നും ആവശ്യപ്പെട്ടിരുന്നു. പിങ്ക് പോലീസ് ഉദ്യോഗസ്ഥയെ സംരക്ഷിക്കും വിധം റിപ്പോര്ട്ട് നല്കിയ ഡിജിപിയെയും കോടതി വിമര്ശിച്ചിരുന്നു. കാക്കി കാക്കിയെ സംരക്ഷിക്കുന്ന നിലപാടാണ് സ്വീകരിക്കുന്നത്. യൂണിഫോമിട്ടാല് എന്തും ചെയ്യാം എന്നാണോ എന്നും കേസ് പരിഗണിച്ച വേളയില് ജസ്റ്റിസ് ദേവന് രാമചന്ദ്രന് ചോദിച്ചിരുന്നു.
പോലീസ് ഉദ്യോഗസ്ഥയയായ രജിതയുടെ മാപ്പപേക്ഷ അംഗീകരിക്കില്ലെന്ന് കുട്ടിയുടെ അഭിഭാഷക കോടതിയില് അറിയിച്ചിട്ടുണ്ട്. കുട്ടി വലിയതോതിലുള്ള മാനസിക സംഘര്ഷം അനുഭവച്ചിട്ടുണ്ടെന്നും അധികൃതരില് നിന്ന് നീതികിട്ടിയില്ലെന്നും അതിനാല് മാപ്പ് അപേക്ഷ അംഗീകരിക്കാന് സാധിക്കില്ലെന്നും കുട്ടിയുടെ അഭിഭാഷക വ്യക്തമാക്കി. തിരുവനന്തപുരം ആറ്റിങ്ങലിലാണ് എട്ട് വയസ്സുകാരിയെയും പിതാവിനെയും പിങ്ക് പോലീസ് ഉദ്യോഗസ്ഥ അപമാനിച്ചത്. മൊബൈല് ഫോണ് മോഷ്ടിച്ചെന്ന് ആരോപിച്ചായിരുന്നു പരസ്യവിചാരണ. പോലീസ് ഉദ്യോഗസ്ഥ രജിതക്കെതിരെ നടപടി വേണമെന്ന് ആവശ്യപ്പെട്ട് സെക്രട്ടറിയേറ്റിനുമുന്നിലും പ്രതിഷേധം നടന്നിരുന്നു. സ്ഥലം മാറ്റത്തിലൂടെ ഇവരെ രക്ഷിക്കാനാണ് പോലീസിന്റെ ശ്രമമെന്നും കുടുംബം ആരോപിച്ചിരുന്നു. അതേസമയം മോഷ്ടിച്ചെന്നാരോപിച്ച മൊബൈല് ഫോണ് പോലീസ് ഉദ്യോഗസ്ഥയുടെ ബാഗില് നിന്ന് തന്നെ കണ്ടെത്തുകയും ചെയ്തിരുന്നു.
