ഹൈദരാബാദ്: സ്ഥാപനത്തിന്റെ കസ്റ്റമർ റേറ്റിങ്ങുമായി ബന്ധപ്പെട്ട തർക്കത്തിന് പിന്നാലെ ഓൺലൈൻ ഭക്ഷണവിതരണ സ്ഥാപനമായ സൊമാറ്റോയുടെ ഡെലിവറി ജീവനക്കാരനെ മർദിച്ച് പിസ്സാ ഹട്ട് ജീവനക്കാരൻ. ഹൈദരാബാദിൽ ഞായറാഴ്ച ആയിരുന്നു സംഭവം. പിസ്സാ ഹട്ടിൽനിന്നും ഓർഡർ എടുക്കാനായി എത്തിയതായിരുന്നു സൊമാറ്റോ ഡെലിവറി ജീവനക്കാരൻ. ഈ സമയം പിസ്സാ ഹട്ടിലെ ജീവനക്കാരൻ സ്ഥാപനത്തിന്റെ റേറ്റിങ്ങുമായി ബന്ധപ്പെട്ട് ഇയാളോട് വാക്കേറ്റത്തിൽ ഏർപ്പെടുകയായിരുന്നു.
കസ്റ്റമർ റേറ്റിങ്ങ് കുറയാൻ കാരണം ഡെലിവറി ജീവനക്കാരന്റെ പ്രശ്നമാണെന്നായിരുന്നു പിസ്സാ ഹട്ട് ജീവനക്കാരന്റെ ആരോപണം. സംസാരം സംഘർഷത്തിലെത്തുകയും പിസ്സാ ഹട്ട് ജീവനക്കാരൻ തന്നെ മർദിക്കുകയും നിലത്തിട്ട് വലിച്ചിഴക്കുകയും ചെയ്തുവെന്ന് ഡെലിവറി ജീവനക്കാരൻ ആരോപിച്ചു. ഇത് സിസിടിവി ദൃശ്യങ്ങളിലും വ്യക്തമാണ്.
