കോഴിക്കോട്: ശ്രീറാം വെങ്കിട്ടരാമനെ ആലപ്പുഴ കലക്ടറായി നിയമിച്ചതിനെതിരെ രൂക്ഷ വിമര്ശനവുമായി മുസ് ലിം ലീഗ് നേതാവും മുന് മന്ത്രിയുമായ പി.കെ. അബ്ദുറബ്ബ്. ശ്രീറാമിനെ മാറ്റി നിയമിച്ചതിനെ ‘എന്തൊരു ശിക്ഷ!’ എന്നാണ് അബ്ദുറബ്ബ് ഫേസ്ബുക്കില് കുറിച്ചത്. മാധ്യമപ്രവര്ത്തകന് കെ.എം. ബഷീറിനെ കാറിടിച്ച് കൊന്നക്കേസിലെ പ്രതിയായ ശ്രീറാം വെങ്കിട്ടരാമനെ കുറിച്ച് മുന് മന്ത്രിയും സി.പി.എം നേതാവുമായ എം.എം. മണി എഴുതിയ ഫേസ്ബുക്ക് പോസ്റ്റും അബ്ദുറബ്ബ് പങ്കുവെച്ചിട്ടുണ്ട്. നിലവില് ആരോഗ്യ വകുപ്പ് ജോയിന്റ് സെക്രട്ടറിയായിരുന്നു ശ്രീറാം വെങ്കിട്ടരാമന്. ശ്രീറാമിന്റെ ഭാര്യയും ആലപ്പുഴ കലക്ടറുമായ ഡോ. രേണുരാജിനെ എറണാകുളം കലക്ടറായി മാറ്റി നിയമിച്ചു.
പി.കെ. അബ്ദുറബ്ബ് ഫേസ്ബുക്ക് പോസ്റ്റ്
സിറാജ് ദിനപത്രത്തിന്റെ തിരുവനന്തപുരം ബ്യൂറോ ചീഫായിരുന്ന കെ.എം. ബഷീറിനെ കാറിടിച്ചു കൊന്ന കേസില് കുറ്റാരോപണ വിധേയനായ ഐ.എ.എസ് ഉദ്യോഗസ്ഥന് ശ്രീറാം വെങ്കട്ടരാമന് സര്വ്വീസില് തിരിച്ചെടുത്തിട്ട് നാളേറെയായി. ബഷീര് കൊല്ലപ്പെട്ടിട്ട് ഈ വരുന്ന ആഗസ്ത് 3ന് മൂന്നു വര്ഷം തികയുമ്പോള് കുറ്റാരോപണ വിധേയനായ ആ ഐ.എ.എസ് ഉദ്യോഗസ്ഥനെ കലക്ടറാക്കി തിരുവനന്തപുരത്ത് നിന്നും 150 കിലോമീറ്റര് അകലെ ആലപ്പുഴയിലേക്ക് നാടു കടത്തിയിരിക്കുന്നു.. എന്തൊരു ശിക്ഷ! എം.എം.മണി അന്ന് എഫ്.ബി പോസ്റ്റില് പറഞ്ഞതെത്ര ശരി..! ഐ.എ.എസ് ഉദ്യോഗസ്ഥനെന്ന ഒരു പരിഗണനയും നല്കിയില്ല… ഓടിച്ചു വിട്ടു അങ്ങകലെ ആലപ്പുഴയിലേക്ക്!
