തിരുവനന്തപുരം : കെ-റെയില് പദ്ധതിയില് കേരളത്തിലെ ജനങ്ങള്ക്കുള്ള ആശങ്ക കേന്ദ്ര റെയില്വേ മന്ത്രിയെ കണ്ട് അറിയിച്ചതായി ബിജെപി നേതാവ് പി.കെ.കൃഷ്ണദാസ്. പദ്ധതി നടപ്പിലാക്കിയാലുള്ള വിവിധ പ്രത്യാഘാതങ്ങള് റെയില്വേ മന്ത്രി കൂടിക്കാഴ്ചയില് ചൂണ്ടിക്കാട്ടിയെന്നും കൃഷ്ണദാസ് പറഞ്ഞു. സില്വര് ലൈന് പദ്ധതിയേക്കാള് കേരളത്തിന് നല്ലത് ഗോള്ഡന് ലൈനാണെന്നും സര്ക്കാര് അതിനെ കുറിച്ച് ആലോചിക്കണമെന്നും കൃഷ്ണദാസ് അഭിപ്രായപ്പെട്ടു.
കെ റെയില് വലിയ സാമ്പത്തിക ബാധ്യതയുണ്ടാക്കുമെന്നും അനിവാര്യമായ പദ്ധതിയല്ലെന്നുമുള്ള ആശങ്കകള് റെയില്വെ മന്ത്രി പങ്കു വെച്ചതായും അദ്ദേഹം പറഞ്ഞു. വീടും സ്വത്തും നഷ്ടമാകുന്നവരുമായി ഒരു ചര്ച്ചക്കും മുഖ്യമന്ത്രി തയ്യാറാകുന്നില്ല. ഇന്നത്തെ മുഖ്യമന്ത്രിയുടെ യോഗംവെറും തട്ടിപ്പായിരുന്നുവെന്നും അദ്ദേഹം അഭിപ്രായപ്പെട്ടു. കെ റെയില് പദ്ധതിയുടെ ഡിപിആര് ഒരു രഹസ്യ രേഖയായി വെച്ചിരിക്കുകയാണെന്നും പദ്ധതിയുടെ ഗുണോഭക്താവ് സിപിഎം മാത്രമാണെന്നും കൃഷ്ണദാസ് പറഞ്ഞു.