തിരുവനന്തപുരം: ഏപ്രില്‍ ഇരുപത്തിയെട്ടിന് തുടങ്ങുന്ന ഹയര്‍ സെക്കന്‍ഡറി പ്രാക്‌ടിക്കല്‍ പരീക്ഷകള്‍ കൊവിഡ് വ്യാപന പശ്ചാത്തലത്തില്‍ മാറ്റണമെന്ന ആവശ്യം പരിശോധിച്ച്‌ പൊതു വിദ്യാഭ്യാസ വകുപ്പ് ഡയറക്‌ടര്‍ അടിയന്തര വിശദീകരണം നല്‍കണമെന്ന് സംസ്ഥാന മനുഷ്യാവകാശ കമ്മിഷന്‍. വരുന്ന തിങ്കളാഴ്‌ച റിപ്പോര്‍ട്ട് സമര്‍പ്പിക്കണമെന്നാണ് കമ്മിഷന്‍ ജുഡീഷ്യല്‍ അംഗം കെ ബൈജുനാഥ് ആവശ്യപ്പെട്ടത്.
പ്രാക്‌ടിക്കല്‍ പരീക്ഷ മാറ്റിവെയ്‌ക്കണമെന്നാണ് വിദ്യാര്‍ത്ഥികളുടെ ആവശ്യം. സയന്‍സ്, കൊമേഴ്സ്, ഹ്യുമാനിറ്റിസ് വിഷയങ്ങള്‍ക്ക് പ്രാക്‌ടിക്കല്‍ പരീക്ഷയുണ്ട്. പതിവായുളള പ്രാക്‌ടിക്കലിന് പുറമേ ഇക്കുറി കണക്കിനും പ്രായോഗിക പരീക്ഷയുണ്ട്. പ്രായോഗിക പരീക്ഷക്ക് പരിമിത സൗകര്യമുളള സ്‌കൂള്‍ ലാബുകള്‍ പങ്കിടുന്നത് രോഗവ്യാപനത്തിന് ഇടയാക്കുമെന്നാണ് വിദ്യാര്‍ത്ഥികള്‍ അടക്കം പറയുന്നത്.
സാധാരണ തിയറി പരീക്ഷയ്‌ക്ക് മുമ്പാണ് പ്രായോഗിക പരീക്ഷകള്‍ നടത്താറുളളത്. മാര്‍ച്ചില്‍ നടക്കേണ്ട എഴുത്തു പരീക്ഷ ഏപ്രിലിലേക്ക് മാറ്റിയതോടെയാണ് പ്രാക്‌ടിക്കല്‍ പരീക്ഷയും തകിടം മറിഞ്ഞത്. ലാബുകളില്‍ സാമൂഹിക അകലം പ്രായോഗികമല്ലെന്ന് വിദ്യാര്‍ത്ഥികളും രക്ഷകര്‍ത്താക്കളും പറയുന്നു.
പ്രാക്‌ടിക്കല്‍ പരീക്ഷ നടത്തുന്ന അദ്ധ്യാപകര്‍ ഒന്നിലധികം കേന്ദ്രങ്ങളില്‍ ജോലി ചെയ്യുന്നവരാണ്. ഇതും രോഗ വ്യാപനത്തിന് കാരണമാകുമെന്ന് പരാതിയുണ്ട്. പി എസ് സി , സി ബി എസ് ഇ, സര്‍വകലാശാലാ പരീക്ഷകള്‍ മാറ്റിയ സാഹചര്യത്തില്‍ പ്രായോഗിക പരീക്ഷ മാറ്റണമെന്നാണ് ആവശ്യം. മാധ്യമ വാര്‍ത്തകളുടെ അടിസ്ഥാനത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.
