ചാത്തന്നൂര് : കണ്ടയ്നര് ലോറി ബൈക്കിലിടിച്ച് ബൈക്ക് യാത്രക്കാരായ അച്ഛനും മകളും മരിച്ചു.കൊട്ടിയം സിതാര ജംഗ്ഷന് സമീപം വാഴ വിള പുത്തന്വീട്ടില് വിമുക്തഭടനായ ഗോപകുമാര് (51), മകള് ഗൗരി (16) എന്നിവരാണ് മരിച്ചത്. ഇന്ന് രാവിലെ 9.15 ഓടെ ദേശീയ പാതയിലെ കൊട്ടിയം മൈലക്കാട് ഇറക്കത്താണ് അപകടമുണ്ടായത്. ചാത്തന്നൂര് ഗവ.വി.എച്ച് എസ് എസിലെ പ്ലസ് വണ് വിദ്യാര്ത്ഥിനിയാണ് ഗൗരി. ഗൗരിയെ സ്കൂളില് എത്തിക്കാന് വേണ്ടിയാണ് ഇരുവരും ബൈക്കില് പുറപ്പെട്ടത്. മൈലക്കാട് ഇറക്കത്ത് വെച്ച് ഇടറോഡില് നിന്നും ദേശീയ പാതയിലേയ്ക്ക് പ്രവേശിക്കുമ്പോഴായിരുന്നു അപകടം.
കൊല്ലം ഭാഗത്ത് നിന്നും തിരുവനന്തപുരം ഭാഗത്തേക്ക് പോവുകയായിരുന്ന കണ്ടയ്നനറിന്റെ വശം അതേ ദിശയിയില് പോവുകയായിരുന്ന ബൈക്കില് തട്ടുകയായിരുന്നു. ബൈക്ക് കണ്ടയ്നറിന് അടിയില്പ്പെട്ടു വീല് കയറിയിറങ്ങി. ഇരുവരും സംഭവ സ്ഥലത്ത് വെച്ച് തന്നെ മരണമടഞ്ഞു. മൃതദേഹങ്ങള് കൊട്ടിയത്തെ സ്വകാര്യാശുപത്രിയിലേയ്ക്ക് മാറ്റി. കണ്ടെയ്നര് ഡ്രൈവറെ കൊട്ടിയം പോലീസ് കസ്റ്റഡിയിലെടുത്തിട്ടുണ്ട്.
