റാന്നി: പുനലൂർ – മൂവാറ്റുപുഴ സംസ്ഥാന പാതയിൽ റാന്നി ഉതിമൂട് കനാലിന്റെ താഴെ പ്ലൈവുഡ് അവശിഷ്ടങ്ങൾ റോഡിലേക്ക് തള്ളിയത് യാത്രക്കാര്ക്ക് അപകടഭീതി സൃഷ്ടിക്കുന്നു. ഒരാഴ്ചയായി ഇവിടെ അടിഞ്ഞുകൂടിക്കിടക്കുന്ന പ്ലൈവുഡ് വേസ്റ്റ് കാരണം ഇരുചക്ര വാഹനങ്ങൾ അപകടത്തിൽപ്പെടുന്നത് നിത്യസംഭവമായിരിക്കുകയാണ്. റോഡിന്റെ ഒരു ഭാഗം പൂർണ്ണമായും കൈയേറിയ നിലയിലാണ് അവശിഷ്ടങ്ങൾ കിടക്കുന്നത്. നേര്ദിശയില് വരുന്ന വാഹനങ്ങള് പാലത്തിന് സമീപത്തെ ചെറിയ വളവുള്ള ഈ ഭാഗത്ത് പെട്ടെന്ന് ബ്രേക്ക് ഇടേണ്ടി വരുമ്പോൾ വാഹനങ്ങൾ തെന്നി മറിയുകയാണ്. കഴിഞ്ഞ ദിവസങ്ങളിലും നിരവധി ഇരുചക്ര വാഹന യാത്രക്കാർക്ക് ഇവിടെ വീണ് പരിക്കേറ്റിട്ടുണ്ട്.
രാത്രികാലങ്ങളിൽ വെളിച്ചക്കുറവുള്ളതിനാൽ ദൂരെനിന്നും എത്തുന്ന യാത്രക്കാർക്ക് ഈ തടസ്സം തിരിച്ചറിയാൻ കഴിയാത്തത് അപകടസാധ്യത വർദ്ധിപ്പിക്കുന്നു. മാലിന്യപ്രശ്നത്തിന് പുറമെ നീർപ്പാലത്തിന്റെ ഉയരക്കുറവും ഈ പാതയിൽ വലിയ പ്രതിസന്ധി സൃഷ്ടിക്കുന്നുണ്ട്. ഉയരം കൂടിയ ലോറികൾക്കും മറ്റ് ഭാരവാഹനങ്ങൾക്കും പാലത്തിനടിയിലൂടെ കടന്നുപോകാൻ കഴിയാത്ത അവസ്ഥയാണ്. പാലത്തിൽ തട്ടുമെന്ന ഭയത്താൽ വാഹനങ്ങൾ പെട്ടെന്ന് നിർത്തുന്നതും വഴിതിരിച്ചുവിടുന്നതും ഈ മേഖലയിൽ വലിയ ഗതാഗതക്കുരുക്കിന് കാരണമാകുന്നു. ഇത്തരത്തില് പ്ലൈവുഡ് വേസ്റ്റുമായെത്തിയ ലോറി പാലത്തിന് കീഴിലൂടെ കടന്നു പോയപ്പോള് വീണതാണ് ഇത്.
സംസ്ഥാന പാതയിലെ പ്രധാനപ്പെട്ട ഈ ഭാഗത്തെ അപകടാവസ്ഥ പരിഹരിക്കാൻ അധികൃതർ ഇതുവരെ തയ്യാറായിട്ടില്ലെന്ന് നാട്ടുകാർ ആരോപിക്കുന്നു. റോഡിലെ പ്ലൈവുഡ് അവശിഷ്ടങ്ങൾ ഉടൻ നീക്കം ചെയ്യണമെന്നും പാലത്തിന്റെ ഉയരക്കുറവ് പരിഹരിക്കാൻ ശാസ്ത്രീയമായ നടപടികൾ സ്വീകരിക്കണമെന്നുമാണ് യാത്രക്കാരുടെ ആവശ്യം. വലിയൊരു അപകടം സംഭവിക്കുന്നതിന് മുൻപ് പൊതുമരാമത്ത് വകുപ്പും പോലീസും ഇടപെടണമെന്നാണ് നാട്ടുകാരുടെ ആവശ്യം.
