ന്യൂഡല്ഹി : പ്രധാനമന്ത്രി നരേന്ദ്രമോദി ഇന്ന് അയോധ്യയില്. വൈകിട്ടോടെ അയോധ്യയിലെ രാമക്ഷേത്രത്തിലെത്തുന്ന നരേന്ദ്രമോദി ദര്ശനം നടത്തുകയും ക്ഷേത്രത്തിന്റെ നിര്മ്മാണ പുരോഗതി വിലയിരുത്തുകയും ചെയ്യും. ദീപാവലി ആഘോഷങ്ങളുടെ ഭാഗമായി വൈകിട്ട് ആറരയോടെ സരയു നദിക്കരയില് നടക്കുന്ന ദീപോത്സവത്തിലും മോദി പങ്കെടുക്കും. പ്രധാനമന്ത്രിയുടെ സന്ദര്ശനത്തിന്റെ ഭാഗമായി 15 ലക്ഷം ദീപങ്ങളാണ് ചടങ്ങില് തെളിയിക്കുക. ശേഷം നടക്കുന്ന ലേസര് ഷോയ്ക്കും മോദി സാക്ഷ്യം വഹിക്കും. ദീപോത്സവ ചടങ്ങില് ആദ്യമായാണ് പ്രധാനമന്ത്രി നേരിട്ട് പങ്കെടുക്കുന്നത്.
രാമക്ഷേത്രത്തിന്റെ നിര്മ്മാണം ദ്രുതഗതിയില് പുരോഗമിക്കുകയാണ്. പ്രധാന ക്ഷേത്ര കെട്ടിടത്തിന്റെ അടിത്തറ നിര്മ്മാണം പൂര്ത്തിയായിട്ടുണ്ട്. ക്ഷേത്ര നിര്മ്മാണം 21 അടി ഉയരത്തില് എത്തിയിരിക്കുകയാണിപ്പോള്. അടുത്ത വര്ഷം ഡിസംബറോടുകൂടി ക്ഷേത്രത്തിന്റെ ഒരു ഭാഗം തീര്ഥാടകര്ക്കായി തുറന്നു നല്കുമെന്നാണ് അധികൃതര് അറിയിച്ചിട്ടുള്ളത്.
