കൊല്ലം : പ്രണയം നടിച്ച്‌ പത്താം ക്ലാസുകാരിയെ പീഡിപ്പിച്ച യുവാവ് അറസ്റ്റില്‍. പെണ്‍കുട്ടിയുടെ അര്‍ദ്ധ നഗ്‌ന ചിത്രം സമൂഹമാധ്യമങ്ങളില്‍ പ്രചരിപ്പിക്കുമെന്ന് ഭീഷണിപ്പെടുത്തിയാണ് പീഡനത്തിനിരയാക്കിയതെന്ന് പോലീസ് പറഞ്ഞു. സംഭവത്തില്‍ ചിതറ സ്വദേശിയും ഹോട്ടല്‍ മാനേജ്‌മെന്റ് വിദ്യാര്‍ത്ഥിയുമായ സിദ്ദിഖിനെ പോക്‌സോ ഉള്‍പ്പെടെയുള്ള വകുപ്പുകള്‍ ചുമത്തി കടയ്ക്കല്‍ പോലീസ് അറസ്റ്റ് ചെയ്തു. പ്രതി പെണ്‍കുട്ടിയുടെ സ്വര്‍ണമാല കൈക്കലാക്കുകയും ഇത് വില്‍ക്കുകയും ചെയ്തു. ഈ തുക ഉപയോഗിച്ച്‌ മൊബൈല്‍ ഫോണുകള്‍ വാങ്ങി. ഒന്ന് ഇയാള്‍ കൈവശം വയ്ക്കുകയും മറ്റൊന്ന് പെണ്‍കുട്ടിക്ക് നല്‍കുകയുമായിരുന്നു.
അതേസമയം മാല കളഞ്ഞു പോയതായാണ് പെണ്‍കുട്ടി രക്ഷകര്‍ത്താക്കളെ വിശ്വസിപ്പിച്ചത്. പെണ്‍കുട്ടിയുടെ സ്വഭാവത്തില്‍ സംശയം തോന്നിയ വീട്ടുകാര്‍ നടത്തിയ അന്വേഷണത്തിലാണ് പീഡന വിവരം പുറത്തറിഞ്ഞത്. അറസ്റ്റിലായ യുവാവ് പെണ്‍കുട്ടിയുമായി സ്ഥിരമായി വീഡിയോ ചാറ്റ് നടത്തിയിരുന്നതായും കണ്ടെത്തി. കഴിഞ്ഞ ദിവസം കസ്റ്റഡിയിലെടുത്ത യുവാവ് കുറ്റം സമ്മതിച്ചു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
