പത്തനംതിട്ട: വയ്യാറ്റുപ്പുഴയില് പോലീസ് കസ്റ്റഡിയില്നിന്ന് രക്ഷപെട്ട പോക്സോ കേസ് പ്രതിയെ പോലീസ് പിടികൂടി. കഴിഞ്ഞദിവസം തെളിവെടുപ്പിനിടെ കസ്റ്റഡിയില്നിന്ന് രക്ഷപെട്ട മീന്കുഴി തോട്ടുഭാഗം ജിതിനെയാണ് വ്യാഴാഴ്ച പുലര്ച്ചെ വീട്ടില്നിന്ന് പോലീസ് പിടികൂടിയത്. ജിതിനെ തെളിവെടുപ്പിന് എത്തിച്ചപ്പോള് ഓടിപ്പോവുകയായിരുന്നു. എന്നാല് പോലീസുകാര് പിന്നാലെ ഓടിയെങ്കിലും ജിതിനെ കണ്ടെത്താനായില്ല.
പോക്സോ കേസില് പ്രതിയായ ജിതിനെ ബുധനാഴ്ച രാവിലെയാണ് ചിറ്റാര് പോലീസ് അറസ്റ്റ് ചെയ്തത്. വൈകിട്ട് ആറുമണിയോടെ ഒരു കൈയില് വിലങ്ങണിയിച്ച് പ്രതിയുമായി പോലീസ് വയ്യാറ്റുപ്പുഴയില് തെളിവെടുപ്പിനെത്തി. ഇതിനിടെയാണ് ഇയാള് പോലീസിനെ വെട്ടിച്ച് കസ്റ്റഡിയില്നിന്ന് രക്ഷപെട്ടത്. രക്ഷപെട്ട ജിതിന് സമീപത്തെ വനത്തിലേക്കാണ് ഓടിക്കയറിയത്. രക്ഷപെടാനുള്ള ശ്രമത്തിനിടെ ഇയാളുടെ വസ്ത്രങ്ങള് കീറിപ്പോയിരുന്നു. രാത്രി നടത്തിയ തിരച്ചിലില് കീറിയ വസ്ത്രങ്ങള് ഉപേക്ഷിച്ചനിലയില് കണ്ടെത്തി. ഇതോടെയാണ് ജിതിന് വസ്ത്രമെടുക്കാനായി വീട്ടിലെത്തിയത്. ഈ സമയം പോലീസ് സംഘം പ്രതിയെ പിടികൂടുകയായിരുന്നു. പുലര്ച്ചെ നാലരയോടെയാണ് ജിതിന് വസ്ത്രമെടുക്കാനായി വീട്ടിലെത്തിയത്.
