മഞ്ചേരി: മലപ്പുറത്ത് പതിനാലു വയസ്സുകാരിയായ മകളെ ബലാത്സംഗം ചെയ്ത പിതാവിനെ മഞ്ചേരി പോക്സോ സ്പെഷല് അതിവേഗ കോടതി 63 വര്ഷം കഠിനതടവിനും ഏഴ് ക്ഷം രൂപ പിഴയടക്കാനും ശിക്ഷിച്ചു. മഞ്ചേരി സ്വദേശിയായ 48കാരനെയാണ് ജഡ്ജി എ.എം. അഷ്റഫ് ശിക്ഷിച്ചത്. വിവിധ വകുപ്പുകളിലായുള്ള തടവുശിക്ഷ ഒരുമിച്ചനുഭവിച്ചാല് മതിയെന്നതിനാല് ഫലത്തില് പ്രതി 20 വര്ഷത്തെ കഠിനതടവ് അനുഭവിച്ചാല് മതി. പോക്സോ ആക്ടിലെ മൂന്ന് വകുപ്പുകളില് 20 വര്ഷം വീതം കഠിന തടവ്, രണ്ട് ലക്ഷം രൂപ വീതം പിഴ എന്നിങ്ങനെയാണ് ശിക്ഷ. പിഴയടക്കുന്നപക്ഷം തുക അതിജീവിതക്ക് നല്കാനും കോടതി വിധിച്ചു.
പതിനാലു വയസ്സുകാരിയായ മകളെ 2020 മുതല് 2022 ജൂണ് വരെ വാടകക്ക് താമസിച്ച വീടുകളില് വച്ചായിരുന്നു പീഡിപ്പിച്ചത്. സ്കൂളിലെ കൗണ്സലിങ്ങിനിടെ കുട്ടി വിവരം അധ്യാപകരോട് പറഞ്ഞതോടെയാണ് പീഡനവിവരം അറിഞ്ഞത്. തുടര്ന്ന് കുട്ടിയുടെ മാതാവിന്റെ പരാതിയില് 2022 ജൂണ് 29ന് മഞ്ചേരി പോലീസ് പ്രതിയെ അറസ്റ്റ് ചെയ്തു. ജുഡീഷ്യല് കസ്റ്റഡിയില് വിചാരണ നടത്തണമെന്ന പോലീസ് അപേക്ഷപ്രകാരം പ്രതിക്ക് ജാമ്യം അനുവദിച്ചിരുന്നില്ല. പിഴയടക്കാത്തപക്ഷം മൂന്നുമാസം വീതം അധിക തടവ് അനുഭവിക്കണം. ജുവനൈല് ജസ്റ്റിസ് ആക്ട് പ്രകാരം മൂന്നുവര്ഷം കഠിനതടവ്, ഒരു ലക്ഷം രൂപ പിഴ, പിഴയടക്കാത്തപക്ഷം രണ്ടുമാസത്തെ അധിക തടവും ശിക്ഷയുണ്ട്.
