ഹരിപ്പാട് : പ്രായപൂർത്തിയാകാത്ത പെൺകുട്ടിയെ പീഡിപ്പിച്ചയാൾക്ക് 70 വർഷം കഠിന തടവും 75000 രൂപ പിഴയും. താമരക്കുളം സ്വദേശി ബാബുവിനാണ് ഹരിപ്പാട് സ്പെഷൽ ഫാസ്റ്റ് ട്രാക്ക് കോടതി ജഡ്ജി വി. വിഷ്ണു ശിക്ഷ വിധിച്ചത്. 16 വയസ്സിൽ താഴെയുള്ള കുട്ടിയെ പീഡിപ്പിച്ചതിന് 20 വർഷവും ആവർത്തിച്ചുള്ള പീഡനത്തിന് 20 വർഷവും കുട്ടിക്ക് സമ്മതം നൽകാൻ പ്രാപ്തിയില്ലെന്നിരിക്കെ പീഡിപ്പിച്ചതിന് 20 വർഷവും പ്രകൃതി വിരുദ്ധ പീഡനത്തിന് 10 വർഷവും ഉൾപ്പെടെയാണ് 70 വർഷത്തെ തടവ്.
ശിക്ഷ ഒന്നിച്ച് അനുഭവിച്ചാൽ മതി എന്നതിനാൽ 20 വർഷം കഠിന തടവ് അനുഭവിച്ചാൽ മതിയാകും. പിഴ അടച്ചില്ലെങ്കിൽ 9 മാസം കൂടി കഠിന തടവ് അനുഭവിക്കണം. കേസിൽ കുട്ടിയുടെ അമ്മ ഉൾപ്പെടെ സാക്ഷികൾ കൂറുമാറിയിരുന്നു. അമ്മ മകൾക്കെതിരെ മൊഴി നൽകുകയും ചെയ്തിരുന്നു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ എസ്. രഘു ഹാജരായി.
