ആലപ്പുഴ : കനാലുകളിലും തോടുകളിലും നിറഞ്ഞ പോള ശല്യം ഒഴിവാക്കാന്‍ പുതിയ പദ്ധതിയുമായി ആലപ്പുഴ നഗരസഭ. ഉണങ്ങിയ കുളവാഴത്തണ്ടുകളുടെ (പോള) ആദ്യ ലോഡ് മധുരയിലേക്ക്‌ അയച്ചു. മധുരയിലെ സ്ഥാപനവുമായി ചേര്‍ന്ന് കുളവാഴയില്‍നിന്ന് ബദല്‍ ഉല്‍പന്നങ്ങള്‍ കണ്ടെത്തുന്ന സംരംഭത്തിനാണ്‌ നഗരസഭ തുടക്കം കുറിച്ചത്‌. ജലസ്രോതസ്സുകളിലെ മാലിന്യം നീക്കി നീരൊഴുക്ക്‌ വര്‍ധിപ്പിക്കാനുള്ള പ്രവര്‍ത്തനങ്ങള്‍ ഹരിതകേരളം മിഷന്റെ നേതൃത്വത്തില്‍ നടക്കുന്നുണ്ട്. ഇവരുടെ സാങ്കേതിക സഹായത്തോടെയാണ് നഗരസഭ പുതിയ പദ്ധതി ആവിഷ്കരിച്ചത്.
മന്നത്ത്, പവര്‍ഹൗസ്, കളപ്പുര, ആശ്രമം വാര്‍ഡുകളില്‍ തെരഞ്ഞെടുത്ത തൊഴിലാളികള്‍ക്ക് പരിശീലനവും നല്‍കി. കഴിഞ്ഞ 13ന് പദ്ധതിയുടെ ഉദ്ഘാടനവും നടത്തി. ആറാട്ടുവഴി പാലത്തിന്‌ സമീപം എ.എസ് കനാലില്‍നിന്ന് ശേഖരിച്ച കുളവാഴയുടെ വേര് നീക്കി തണ്ടുകള്‍ ഉണക്കി. 60 ശതമാനം ഉണക്കെത്തിയ തണ്ടാണ് ബദല്‍ ഉല്‍പന്ന നിര്‍മിതിക്കായി കൈമാറിയത്. ശേഷിക്കുന്ന വേര് അടക്കം ഭാഗം ജൈവവളമാക്കി കുറ്റിമുല്ല, പച്ചക്കറികൃഷികള്‍ക്ക്‌ ഉപയോഗിക്കും. ഉണക്കിയെടുക്കുന്ന പോളത്തണ്ട് കയറ്റിയയച്ച്‌ കരകൗശല വസ്തുക്കളും സംസ്കരിക്കാവുന്ന നിത്യോപയോഗ പ്ലേറ്റുകളും ഗ്ലാസുകളും നിര്‍മിക്കും. തോടിന് സമീപ വാര്‍ഡുകളിലെ പ്രത്യേകം തെരഞ്ഞെടുത്ത് പരിശീലനം നല്‍കിയ തൊഴിലാളികളാണ് പോള വാരുന്നത്. മറ്റ് പ്രദേശങ്ങളിലേക്കും പദ്ധതി വ്യാപിപ്പിക്കും. ഉണക്കിയെടുത്ത പോളത്തണ്ടിന്റെ ആദ്യ ലോഡ് കയറ്റിഅയച്ചു.
ഇ.എം.എസ് സ്റ്റേഡിയത്തില്‍ നടന്ന ഫ്ലാഗ് ഓഫ് നഗരസഭ വൈസ് ചെയര്‍മാന്‍ പി.എസ്.എം ഹുസൈന്‍ നിര്‍വഹിച്ചു. ആരോഗ്യസ്ഥിരം സമിതി അധ്യക്ഷ ബീനരമേശ്, കൗണ്‍സിലര്‍മാരായ ബി.അജേഷ്, ഹെലന്‍ ഫെര്‍ണാണ്ടസ്, ഹരിത കേരളമിഷന്‍ ജില്ല കോഓഡിനേറ്റര്‍ രാജേഷ്, ഹെല്‍ത്ത് ഓഫിസര്‍ കെ.പി വര്‍ഗീസ്, ഉദ്യോഗസ്ഥരായ സിക്സ്റ്റസ്, സുമേഷ് പവിത്രന്‍, പോള വാരല്‍ തൊഴിലാളികള്‍ തുടങ്ങിയവര്‍ പങ്കെടുത്തു.
