കണ്ണൂര്: കണ്ണൂര് ജില്ലാ പഞ്ചായത്ത് പ്രസിഡന്റ് പിപി ദിവ്യക്ക് വധഭീഷണി ഉയര്ന്ന സംഭവത്തില് പോലീസ് കേസെടുത്തു. അക്രമകാരികളായ തെരുവ് നായകളെ കൊല്ലാന് സുപ്രീം കോടതിയെ സമീപിച്ചതിനെ തുടര്ന്നാണ് വധഭീഷണി ഉയര്ന്നത്. മൃഗസ്നേഹികള് ഉള്പ്പെട്ട വാട്സ്ആപ്പ് ഗ്രൂപ്പിലാണ് ഭീഷണി സന്ദേശം വന്നത്. ഈ സന്ദേശം അടക്കം ഉള്പ്പെടുത്തി പിപി ദിവ്യ കണ്ണൂര് ടൗണ് പോലീസില് പരാതി നല്കിയിരുന്നു.
കേസ് ഇന്ന് സുപ്രീംകോടതിയുടെ പരിഗണനയ്ക്ക് വന്നിരുന്നു. തെരുവ് നായയുടെ കടിയേറ്റ് കുട്ടി മരിച്ചത് ഭൗര്ഭാഗ്യകരമായ സംഭവമെന്ന് സുപ്രീം കോടതി പറഞ്ഞു. അക്രമകാരികളായ തെരുവുനായകളെ ദയാവധം ചെയ്യാന് അനുവദിക്കണമെന്ന ഹര്ജിക്കിടെയാണ് പരാമര്ശം ഉണ്ടായത്. ഹര്ജി പരിഗണിക്കുന്നത് ജൂലായ് 12ലേക്ക് മാറ്റിയിരിക്കുകയാണ്. കേസില് കേന്ദ്രസര്ക്കാര് ഉള്പ്പെടെയുള്ള എതിര്കക്ഷികള് ജൂലായ് ഏഴിനകം മറുപടി നല്കാനും കോടതി ആവശ്യപ്പെട്ടു.
