കോഴിക്കോട് : കോവിഡ് വ്യാപന ഭീതിയെ തുടര്ന്ന് ജോലി ക്രമീകരണവുമായി സിറ്റി പോലീസ്. സേനയിലെ മൂന്നിലൊന്ന് ജീവനക്കാരെ റിസര്വില് നിര്ത്തുകയാണ് ചെയ്യുന്നത്. ഇവര് ഓഫീസില് വരേണ്ടതില്ല. എന്നാല് വീട്ടില്നിന്ന് ജോലികള് നിര്വഹിക്കണം. ഓണ്ലൈനായും മറ്റും ചെയ്യുന്ന ജോലികളാണ് കൂടുതലായി നല്കുക. അതേസമയം ഇവര്ക്ക് പുറത്തുപോകുന്നതിനും പൊതുപരിപാടികളില് പങ്കെടുക്കുന്നതിനുമെല്ലാം വിലക്കുണ്ട്. സിറ്റി പോലീസ് മേധാവി എ.വി. ജോര്ജ് ഡി.സി.പി, അസി. കമ്മീഷണര്മാര് എന്നിവരുമായി കൂടിയാലോചിച്ചാണ് ക്രമീകരണം ഏര്പ്പെടുത്തിയത്.
ഒരാഴ്ച വീതമാണ് മൂന്നിലൊന്ന് ജീവനക്കാരെ റിസര്വില് നിര്ത്തുന്നത്. നഗര പരിധിയില് ദിവസേനയെന്നോണം കോവിഡ് ബാധിതരുടെ എണ്ണം കൂടിയതോടെ ഏതെങ്കിലും ഓഫിസിലെ ഒരു ഉദ്യോഗസ്ഥന് രോഗബാധയുണ്ടായാല് ഓഫീസ് അടച്ച് മുഴുവന് ജീവനക്കാരും ക്വാറന്റീനില് പോവേണ്ട അവസ്ഥയുമാണുള്ളത്. മാത്രമല്ല ട്രാഫിക്കും ആളുകള് കൂടുതലെത്തുന്നതും നിയന്ത്രിക്കുന്നതിന് ചുമതലപ്പെട്ട പോലീസുകാരില് പലരും ദിവസവും നിരവധിപേരുമായാണ് സമ്പര്ക്കമുണ്ടാവുന്നത്. ഈ നിലക്ക് സേനാംഗങ്ങളില് രോഗവ്യാപന സാധ്യത ഏറെയാണ്. ഇത് ഒഴിവാക്കുകകൂടി ലക്ഷ്യമിട്ടാണ് ക്രമീകരണം. വിവിധ വിഭാഗങ്ങളിലായി മൂവായിരത്തോളം പോലീസുകാരാണ് സിറ്റിയിലുള്ളത്.
ജില്ലയിലെ പോലീസുകാര്ക്കിടയിലുണ്ടായ കോവിഡ് വ്യാപനത്തിന് ഉന്നത ഉദ്യോഗസ്ഥര്ക്കുണ്ടായ പാളിച്ചകളും കാരണമായെന്ന് നേരത്തെതന്നെ സേനക്കുള്ളില് ആക്ഷേപമുയര്ന്നിരുന്നു. കോവിഡിന്റെ തുടക്കത്തില് സ്വീകരിച്ച മുന്കരുതലിലും രോഗ പ്രതിരോധ പ്രവര്ത്തനങ്ങളിലും അയവു വന്നുവെന്നതായിരുന്നു പരാതിക്കിടയാക്കിയത്. ഇതെല്ലാം മുന് നിര്ത്തിയാണ് പരിഷ്കാരം. വിജിലന്സ് ആന്ഡ് ആന്റി കറപ്ഷന് ബ്യൂറോ, റൂറല് എസ്.പി ഒഫീസ്, തിരുവമ്പാടി, താമരശ്ശേരി, ബേപ്പൂര്, എലത്തൂര് പോലീസ് സ്റ്റേഷനുകള് എന്നിവിടങ്ങളിലെ ഉദ്യോഗസ്ഥര്ക്കാണ് ജില്ലയില് ഇതിനകം പോസിറ്റിവായത്. നിരവധി ഉദ്യോഗസ്ഥര് ക്വാറന്റീനില് പോവുകയും ചെയ്തിരുന്നു.
