പന്തളം : സ്കൂള് പ്രവേശനവുമായി ബന്ധപ്പട്ട് പന്തളം പോലീസിന്റെ പരിധിയില് വരുന്ന സ്കൂളുകളുടെ പ്രതിനിധികള്ക്ക് ബോധവത്കരണ ക്ലാസ് നടത്തി. ജില്ലാ പോലീസ് മേധാവി ആര്.ആനന്ദിന്റെ നിർദ്ദേശ പ്രകാരമായിരുന്നു യോഗം. എക്സൈസ്, ഫോറസ്റ്റ്, ഹെൽത്ത്, ആർ.ടി.ഒ, ഫയർഫോഴ്സ് എന്നീ ഡിപ്പാര്ട്ട്മെന്റ് കളുടെ സഹകരണത്തോടെയായിരുന്നു ക്ലാസ്. പന്തളം എസ്.എച്ച്.ഓ സജീഷ് കുമാറിന്റെ നേതൃത്വത്തിൽ പന്തളം പോലീസ് സ്റ്റേഷൻ ജനമൈത്രി ഹാളിൽ ആയിരുന്നു പരിപാടി.
വിവിധ വകുപ്പുകളിൽ നിന്നുള്ള ഉദ്യോഗസ്ഥർ ക്ലാസുകൾ എടുത്തു. സ്കൂൾ വാഹനങ്ങൾ ഓടിക്കുന്ന ഡ്രൈവർമാർ പാലിക്കേണ്ട നിർദ്ദേശങ്ങൾ, വിദ്യാർത്ഥികളുടെ ഇടയിൽ ലഹരി സംഘങ്ങളുടെ സ്വാധീനം വർദ്ധിച്ചുവരുന്ന സാഹചര്യത്തിൽ പുലർത്തേണ്ട മുൻകരുതലുകൾ, ഫസ്റ്റ് എയ്ഡ്, മറ്റ് ജാഗ്രത നിർദ്ദേശങ്ങൾ തുടങ്ങിയവയെപ്പറ്റിയെല്ലാം വിശദമായ ക്ലാസുകൾ നടന്നു. ജില്ലയിലെ മറ്റ് സ്റ്റേഷൻ പരിധികളിലെ സ്കൂളുകൾക്കായും ഇത്തരത്തിൽ പരിശീലന പരിപാടി സംഘടിപ്പിച്ചിരുന്നു.
