പാലക്കാട് : ജന്തർമന്തറിലെ പോലീസ് നടപടിയിൽ പ്രതിഷേധിച്ച് കഴിഞ്ഞ ഞായറാഴ്ച ടൗൺ റെയിൽവേ സ്റ്റേഷനിലേക്കു മാർച്ച് നടത്തിയ എസ്എഫ്ഐ പ്രവർത്തകരെ ഇടിവള ഉപയോഗിച്ച് ആക്രമിച്ചെന്നു പരാതി നേരിട്ട പോലീസ് ഉദ്യോഗസ്ഥനു സസ്പെൻഷൻ. കല്ലേക്കാട് എആർ ക്യാംപിലെ സിവിൽ പോലീസ് ഓഫിസർ എം.ഷഫാദിനെതിരെയാണു നടപടി. ഷഫാദ് മദ്യപിച്ചാണു ജോലിക്കെത്തിയതെന്നു വൈദ്യപരിശോധനയിൽ കണ്ടെത്തിയതിനെ തുടർന്നാണു ജില്ലാ പോലീസ് മേധാവി എ.അബ്ദുൽ റഷിയുടെ നടപടി.
എസ്എഫ്ഐ നൽകിയ പരാതിയുടെ അടിസ്ഥാനത്തിലാണു വൈദ്യപരിശോധന നടത്തിയത്. എസ്എഫ്ഐയുടെ സമരത്തിനിടെ പോലീസ് വനിതാ പ്രവർത്തകരെ വലിച്ചിഴച്ചതായും പരാതിയുണ്ട്. ന്യൂ‍ഡൽഹിയിൽ ബിജെപിക്കെതിരെ ഒരുമിച്ചു സമരംചെയ്യുകയും ഇവിടെ അത്തരം സമരങ്ങളെ അടിച്ചമർത്തുകയും ചെയ്യുന്നുവെന്നാണ് ഇടതുപക്ഷത്തിന്റെ വിമർശനം. ഇന്നലെ ബിജെപി നടത്തിയ സമരത്തിനിടെയും പോലീസ് അതിക്രമം നടന്നുവെന്നു പരാതിയുണ്ട്.
പാലക്കാട് എംഎൽഎയുടെ ഓഫിസിലേക്കു മാർച്ച് നടത്തി മതിലിൽ പോസ്റ്റർ പതിച്ച ബിജെപി നിയോജകമണ്ഡലം വൈസ് പ്രസിഡന്റ് സുരേഷ് തിരുനെല്ലായി, എസ്‌സി മോർച്ച ജില്ലാ ജനറൽ സെക്രട്ടറി ജി.ഗണേഷ് എന്നിവരെ പോലീസ് മർദിച്ചതായി പരാതി ഉയർന്നു. സുരേഷ് തിരുനെല്ലായിയുടെ തുടയിൽ അടിയേറ്റതിന്റെ പാടുകൾ ഉണ്ട്. മർദിച്ച പോലീസ് ഉദ്യോഗസ്ഥനെതിരെ നടപടി ആവശ്യപ്പെട്ടു ബിജെപി രംഗത്തെത്തി.
