മലപ്പുറം: പാണക്കാട് സാദിഖലി ശിഹാബ് തങ്ങളെ അപകീര്ത്തിപ്പെടുത്താന് ഫേസ്ബുക്കില് പ്രചരിപ്പിച്ച ചിത്രം വ്യാജമെന്ന് പോലീസ്. 17കാരിയുടെ പരാതിയുണ്ടെന്ന പ്രതി മുഹമ്മദ് റോഷന്റെ വാദം അടിസ്ഥാന രഹിതമാണ്. ഫേസ്ബുക്കില് പോസ്റ്റിട്ടത് പണം തട്ടാന് വേണ്ടിയാണ്. കെട്ടുകഥ തയാറാക്കിയതിന് പിന്നില് കൂടുതല് പേരുണ്ടെന്ന നിഗമനത്തിലാണ് പോലീസ്. വ്യാപക അന്വേഷണം നടത്തിയിട്ടും പരാതിക്കാരിയെ കണ്ടെത്താന് കഴിഞ്ഞില്ലെന്ന് പോലീസ് അറിയിച്ചു. കുറ്റകൃത്യത്യത്തില് കൂടുതല് പേര്ക്ക് പങ്കുണ്ടെന്നാണ് പോലീസ് സംശയിക്കുന്നത്. സാദിഖലി തങ്ങളുടെ വ്യാജ ചിത്രം പോസ്റ്റ് ചെയ്ത വ്യാജ ഫേസ്ബുക്ക് അക്കൗണ്ട് നിര്മിച്ചത് അറസ്റ്റിലായ മുഹമ്മദ് റോഷനാണ്. കാപ്പ ചുമത്തിയ മുഹമ്മദ് റോഷനെ വിയ്യൂര് സെന്ട്രല് ജയിലിലേക്ക് മാറ്റി.
ജനുവരി 31ന് സാദിഖലി തങ്ങളുടെ ബന്ധുവായ മുഈനലി തങ്ങളെ പെരിന്തല്മണ്ണയിലെ മാളിലേക്ക് പ്രതി വിളിച്ച് വരുത്തുകയും വ്യാജ ചിത്രങ്ങള് കാണിച്ച് ഇത് മോശം രീതിയില് സാമൂഹിക മാധ്യമങ്ങളില് പ്രചരിപ്പിക്കുമെന്നും ഭീഷണിപ്പെടുത്തിയിരുന്നു. ഇത് ഒഴിവാക്കാന് 15 കോടി രൂപ നല്കണമെന്നായിരുന്നു ആവശ്യം. ഇക്കാര്യം ആരോടെങ്കിലും പറഞ്ഞാല് വധിക്കുമെന്നും പ്രതി ഭീഷണിപ്പെടുത്തിയിരുന്നു. എന്നാല് പണം നല്കാത്തതിനെ തുടര്ന്ന് പ്രതി വ്യാജ ഫേസ്ബുക്ക് ഐഡിയിലൂടെ ചിത്രങ്ങള് ഫേസ്ബുക്കില് പ്രചരിപ്പിക്കുകയായിരുന്നു. ഇതിനെതിരെ മുസ്ലിം ലീഗ് പോലീസില് പരാതി നല്കുകയും നിയമനടപടി ആരംഭിക്കുകയും ചെയ്തിരുന്നു. തുടര്ന്നാണ് മുഹമ്മദ് റോഷനെതിരെ പെരിന്തല്മണ്ണ പോലീസ് കേസെടുത്തത്. ഇയാള് നിരവധി കേസുകളില് പ്രതിയാണ്. ബ്ലാക്ക് മെയില് ചെയ്യാനുള്ള ശ്രമങ്ങള് മൂന്നുമാസം മുമ്പ് തന്നെ ഇയാള് ആരംഭിച്ചിരുന്നതായി പോലീസ് പറഞ്ഞു.
