ന്യൂഡല്‍ഹി: ഡല്‍ഹിയിലെ ആപ് സര്‍ക്കാര്‍ തെരുവില്‍ സ്ഥാപിച്ച ക്യാമറകള്‍ ഡല്‍ഹി പോലീസ് തകര്‍ക്കുന്ന ദൃശ്യം പുറത്ത്. തെരുവില്‍ അഴിഞ്ഞാടുന്ന അക്രമികളെ സംരക്ഷിക്കുന്ന നിലപാടാണ് പോലീസ് സ്വീകരിക്കുന്നതെന്ന ആക്ഷേപം ശക്തമാകുന്നതിനിടെയാണ് മൊബൈല്‍ ഫോണില്‍ പകര്‍ത്തിയ ദൃശ്യം പുറത്ത് വന്നത്. തങ്ങള്‍ ക്യാമറകള്‍ തകര്‍ക്കുന്ന ദൃശ്യം കാഴ്ചക്കാര്‍ പകര്‍ത്തുന്നുണ്ടെന്ന് അറിഞ്ഞ പോലീസുകാര്‍ പിന്‍വാങ്ങുന്നതും പുറത്ത് വന്ന വീഡിയോയില്‍ കാണാം. ഡല്‍ഹി പോലീസിനെയും കേന്ദ്ര ആഭ്യന്തര വകുപ്പിനെയും പ്രതിരോധത്തിലാക്കിയിരിക്കുകയാണ് പുറത്ത് വന്ന ദൃശ്യം. അക്രമം തടയുന്നതിനെതിരെ പോലീസ് ഒന്നും ചെയ്യുന്നില്ലെന്ന വിമര്‍ശനം വരികയും കോടതി വരെ പോലീസിനെതിരെ വിമര്‍ശനം ഉന്നയിക്കുകയും ചെയ്യുന്നതിനിടെയാണ് പുതിയ ദൃശ്യം പുറത്തായത്.
