മൂവാറ്റുപുഴ: പോളിങ്ഉദ്യോഗസ്ഥര്‍ എത്തും മുന്‍പ് പോളിങ്ങ് ബൂത്തായി നിശ്ചയിച്ചിരുന്ന സ്കൂളിലെ സീലിങ് തകര്‍ന്നു. പായിപ്ര പഞ്ചായത്തിലെ 21ാം വാര്‍ഡിലെ പോളിങ് ബൂത്തായി നിശ്ചയിച്ച തൃക്കളത്തൂര്‍ എല്‍.പി സ്കൂളിലെ സീലിങാണ് തകര്‍ന്നത്.
ഇതോടെ മേല്‍ക്കൂരയും അവശേഷിക്കുന്ന സീലിങ്ങും സുരക്ഷിതമല്ലെന്ന നിഗമനത്തില്‍ ബൂത്ത് മാറ്റണമെന്ന ആവശ്യം ഉയര്‍ന്നെങ്കിലും സീലിങ് പൂര്‍ണമായി പൊളിച്ചു നീക്കി ബൂത്ത് ഇവിടെ തന്നെ സജ്ജീകരിക്കാന്‍ തീരുമാനിച്ചു.
ഒരു വര്‍ഷം മുന്‍പാണ്‌ സ്കൂളില്‍ പഞ്ചായത്ത് ഫണ്ട് ചെലവഴിച്ച്‌ സീലിങ്ങും മേല്‍ക്കൂരയും നവീകരിച്ചത്. സീലിങ് പൊളിഞ്ഞു വീണത് നിര്‍മാണത്തിലെ അപാകതയും അഴിമതിയും ആണെന്ന് എല്‍.ഡി.എഫും പ്രശ്നങ്ങളൊന്നും ഇല്ലാതിരുന്ന സീലിങ് പൊളിഞ്ഞു വീണതിനു പിന്നില്‍ രാഷ്ട്രീയ ലക്ഷ്യവും ദുരൂഹതയും ഉണ്ടെന്ന് യു.ഡി.എഫും
ആരോപണം ഉന്നയിച്ചു.
അന്വേഷണം നടത്തണമെന്നും അഴിമതി ഉണ്ടെങ്കില്‍ അതും പുറത്തു കൊണ്ടുവരണമെന്നും വാര്‍ഡ് അംഗമായ എം.സി. വിനയന്‍ ആവശ്യപ്പെട്ടു. വോട്ടര്‍മാരുടെ സുരക്ഷിതത്വം ഉറപ്പു വരുത്തിയ ശേഷം മാത്രമേ സ്കൂളില്‍ വോട്ടെടുപ്പ് നടത്താവൂ എന്ന് ആവശ്യപ്പെട്ട് എല്‍.ഡി.എഫ് കണ്‍വീനര്‍ സുശീല നീലകണ്ഠന്‍ മുഖ്യ തെരഞ്ഞെടുപ്പ് വരണാധികാരിയായ ആര്‍.ഡി.ഒക്ക് പരാതി നല്‍കി. തുടര്‍ന്നാണ് പരിശോധന നടത്തി ബൂത്തിലെ അപകടാവസ്ഥയിലുള്ള സീലിങ് പൊളിച്ചു നീക്കി ഇവിടെ തന്നെ ബൂത്ത് സജ്ജീകരിച്ചത്.
