ഡല്‍ഹി: കോടതി പരിഗണിക്കുന്ന വിഷയത്തില്‍ രാഷ്ട്രീയ പ്രസംഗം വേണ്ടെന്ന് സുപ്രീം കോടതി. കര്‍ണാടകയിലെ മുസ്ലിം സംവരണം റദ്ദാക്കിയ വിഷയം കോടതിയുടെ പരിഗണനയില്‍ ഇരിക്കെ രാഷ്ട്രീയ വിഷയമാക്കുന്നതില്‍ കോടതി അതൃപ്തി അറിയിച്ചത്. ചില പരിപാവനതകള്‍ പാലിക്കേണ്ടതുണ്ടെന്ന്, രാഷ്ട്രീയ പ്രസ്താവനകളില്‍ എതിര്‍പ്പ് അറിയിച്ചുകൊണ്ട് ജസ്റ്റിസുമാരായ കെഎം ജോസഫും ബിവി നാഗരത്നയും അഷ്സാനുദ്ദീന്‍ അമാനുല്ലയും പറഞ്ഞു
മുസ്ലിം സംവരണം പിന്‍വലിച്ചതു തങ്ങളാണെന്ന് ആഭ്യന്തര മന്ത്രി ദിവസവും പ്രസംഗിച്ചുകൊണ്ടിരിക്കുകയാണെന്ന്, ഹര്‍ജിക്കാര്‍ക്കു വേണ്ടി ഹാജരായ ദുഷ്യന്ത് ദവെ ചൂണ്ടിക്കാട്ടി. കോടതി പരിഗണിച്ചുകൊണ്ടിരിക്കുന്ന വിഷയത്തില്‍ എങ്ങനെയാണ് ഇത്തരം പ്രസ്താവനകള്‍ നടത്താനാവുകയെന്ന് ദവെ ചോദിച്ചു.ഇത്തരത്തില്‍ പ്രസ്താവന നടത്തിയതിനെക്കുറിച്ച് അറിവില്ലെന്ന് കര്‍ണാടക സര്‍ക്കാരിനു വേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത പറഞ്ഞു.
