കോന്നി: പോപ്പുലര് ഫിനാന്സ് തട്ടിപ്പ് കേസില് സി.ബി.ഐ തെളിവെടുപ്പ് ആരംഭിച്ചു. ഇന്ന് കൊച്ചിയില് നിന്നുള്ള സി.ബി.ഐ യുടെ പ്രത്യേക സംഘം പ്രധാന പ്രതികളായ തോമസ് ദാനിയേല് (റോയി, ഇയാളുടെ മൂത്ത മകള് റിനു മറിയം തോമസ് എന്നിവരെ കോന്നി വകയാറിലെ പോപ്പുലര് ഫിനാന്സ് കേന്ദ്ര ഓഫീസില് എത്തിച്ച് തെളിവെടുപ്പ് തുടങ്ങി. രാവിലെ 11 മണിയോടെയാണ് സി.ബി.ഐ സംഘം വകയാറില് എത്തിയത്. ഓഫീസില് പോലീസ് സീല് ചെയ്ത രേഖകള് സി ബി ഐയുടെ 10 അംഗ സംഘം പരിശോധന നടത്തുകയാണ്. കോന്നി പോലീസ് കാവല് ഏര്പ്പെടുത്തി.
കേരളത്തിലും പുറത്തുമായി ഉള്ള 286 ശാഖകളില് കൂടി നാലായിരം കോടി രൂപയിലധികമാണ് പ്രതികള് തട്ടിച്ചത്. കേരള ഹൈക്കോടതിയിലും കര്ണ്ണാടക ഹൈക്കോടതിയിലും ഇത് സംബന്ധിച്ച് കേസുകള് നടക്കുന്നുണ്ട്. നിക്ഷേപകരുടെ തുടര്ച്ചയായ നിയമ പോരാട്ടത്തിനൊടുവിലാണ് സി.ബി.ഐ കേസ് ഏറ്റെടുത്തത്.
അതേസമയം പ്രതികള്ക്കുവേണ്ടിയുള്ള ജാമ്യാപേക്ഷകള് എറണാകുളം ബഡ്സ് കോടതിയില് അഭിഭാഷകര് നീക്കിയിട്ടുണ്ട്. ഏതു വിധേനയും ജാമ്യം നേടി പുറത്തിറങ്ങുവാന് പ്രതികള് ശ്രമിക്കുന്നുണ്ട്. ബഡ്സ് കോടതികള് ആരംഭിച്ചെങ്കിലും സംസ്ഥാനം ഇതുവരെ നിയമ ചട്ടക്കൂട് രൂപീകരിച്ചിട്ടില്ല. അതുകൊണ്ടുതന്നെ ബഡ്സ് കോടതികളുടെ പ്രവര്ത്തനം തുടക്കത്തില് എങ്ങനെയാകുമെന്നും പറയാന് കഴിയില്ല.
