പത്തനംതിട്ട : പോപ്പുലര്‍ നിക്ഷേപകരെ പിണറായി സര്‍ക്കാര്‍ വഞ്ചിച്ചു. സര്‍ക്കാര്‍ പ്രഖ്യാപിച്ച ബഡ്സ് കോടതികള്‍ എവിടെയെന്ന് നിക്ഷേപകര്‍. കോമ്പറ്റെന്റ് അതോറിറ്റിയുടെ പ്രവര്‍ത്തനം കടലാസില്‍മാത്രം. കോമ്പറ്റെന്റ് അതോറിറ്റി തലവന്‍ സഞ്ജയ്‌ കൌള്‍ എവിടെയുണ്ടെന്നുപോലും അറിയില്ലെന്ന് തട്ടിപ്പിന് ഇരയായ നിക്ഷേപകര്‍. ഹൈക്കോടതിയുടെ മിക്ക ഉത്തരവുകളും ഏറെ കാലതാമസം വരുത്തിയാണ് സര്‍ക്കാര്‍ നടപ്പിലാക്കുന്നത്. പിണറായി സര്‍ക്കാര്‍ ഇരയോടൊപ്പമല്ല, വേട്ടക്കാരനോടൊപ്പമാണെന്ന് നിക്ഷേപകര്‍ പറയുന്നു.
പോപ്പുലര്‍ തട്ടിപ്പ് പുറത്തുവന്നതോടെ സര്‍ക്കാരും രാഷ്ട്രീയക്കാരും നിക്ഷേപകരെ കയ്യൊഴിയുകയായിരുന്നു. പിണറായി സര്‍ക്കാര്‍ ഒരു സഹായവും നിക്ഷേപകര്‍ക്ക് നല്‍കിയില്ല. പകരം എല്ലാ പരാതികള്‍ക്കും ഒറ്റ എഫ്.ഐ.ആര്‍ മതിയെന്ന വിചിത്ര ഉത്തരവും ഡി.ജി.പിയെക്കൊണ്ട് ഇറക്കിച്ചു. നിക്ഷേപകര്‍ ഹൈക്കോടതിയില്‍ ഹര്‍ജി നല്‍കിയതിന്റെ അടിസ്ഥാനത്തില്‍ സര്‍ക്കാരിന് ഈ ഉത്തരവ് തിരുത്തേണ്ടി വന്നു. എങ്കിലും പോലീസ് വകുപ്പില്‍ നിന്നും നിക്ഷേപകര്‍ക്ക് ഒരു സഹായവും ലഭിച്ചില്ല.
പോലീസ് പിടിച്ചെടുത്ത പോപ്പുലര്‍ ഉടമകളുടെ ആഡംബര കാറുകള്‍ മഴയും വെയിലുമേറ്റ് നശിക്കുന്നു. ബെന്‍സ് കാറുകള്‍ ഉള്‍പ്പെടെയുള്ളവയാണ് മാസങ്ങളായി ഇങ്ങനെ കിടന്ന് നശിക്കുന്നത്. കാലതാമസം വരാതെ ലേലം ചെയ്തിരുന്നെങ്കില്‍ ലക്ഷങ്ങള്‍ കിട്ടുമായിരുന്ന ബെന്‍സ് കാറുകള്‍ ഇനി വില്‍ക്കേണ്ടി വരുന്നത് ആക്രി വിലക്ക്. കേന്ദ്ര അന്വേഷണ സംഘങ്ങള്‍ക്ക് സംസ്ഥാന സര്‍ക്കാര്‍ ഒരു സഹായവും ചെയ്തുനല്‍കുന്നില്ലെന്നും ആരോപണം. മതിയായ ജീവനക്കാര്‍ ഇല്ലാത്തതിനാല്‍ അന്വേഷണം മന്ദഗതിയിലായി. കോടികള്‍ തട്ടിച്ച പോപ്പുലര്‍ ഉടമകള്‍ രക്ഷപെടാനുള്ള തയ്യാറെടുപ്പിലാണ് ഇപ്പോള്‍.
