കൊച്ചി : പോപ്പുലര് ഫിനാന്‍സ് നിക്ഷേപത്തട്ടിപ്പ് സിബിഐ അന്വേഷിക്കണം എന്നാവശ്യപ്പെട്ട് ഹൈക്കോടതിയില്‍ ഹര്‍ജി. അഭിഭാഷകനായ പി രവീന്ദ്രന്‍ പിള്ളയാണ് ഹര്‍ജിക്കാരന്‍. പോലീസ് ഇതുവരെ സ്വീകരിച്ച നടപടി അറിയിക്കാന്‍ നിര്‍ദ്ദേശം നല്‍കണമെന്നും നിക്ഷേപതുക സുരക്ഷിതമാക്കാന്‍ നടപടി വേണമെന്നും ഹര്‍ജിയില്‍ ആവശ്യപ്പെട്ടിട്ടുണ്ട്.
പോപ്പുലര് ഫിനാന്‍സ് തട്ടിപ്പ് കേസില്‍ റിമാന്‍ഡില്‍ കഴിയുന്ന സ്ഥാപന ഉടമകളായ റോയ് ഡാനിയേല്‍ ഭാര്യ പ്രഭ തോമസ്, മക്കളായ റിനു മറിയം തോമസ് , റീബ തോമസ് എന്നിവരെ കസ്റ്റഡിയില്‍ വാങ്ങുന്നതിന് അന്വേഷണ സംഘം കോടതിയില്‍ കസ്റ്റഡി അപേക്ഷ നല്‍കിയിട്ടുണ്ട്. പ്രതികളെ പത്ത് ദിവസത്തേക്കാണ് അന്വേഷണ സംഘം കസ്റ്റഡിയില്‍ ആവശ്യപ്പെട്ടിരിക്കുന്നത്. പത്തനംതിട്ട ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് അപേക്ഷ നല്‍കിയത്. തട്ടിപ്പ് കേസില്‍ ഇവരെ കസ്റ്റഡിയില്‍ കിട്ടിയെങ്കില്‍ മാത്രമെ കൂടുതല്‍ അന്വേഷണം നടത്താന്‍ കഴിയു.
2014 ലാണ് റോയി ഡാനിയേല്‍ മക്കളുടെ പേരിലേക്ക് സ്ഥാപനത്തിന്റെ ഉടമസ്ഥാവകാശം മാറ്റിയത്. ഉടമസ്ഥാവകാശം കിട്ടിയ ഉടന്‍ മക്കള്‍ പോപ്പുലര് ഡീലേഴ്സ്, പോപ്പുലര് പ്രിന്‍റേഴ്‍സ്, നിധി പോപ്പുലര് എന്നീ പേരുകളില്‍ പുതിയ സ്ഥാപനങ്ങള്‍ തുടങ്ങി. ഈ സ്ഥാപനങ്ങളിലേക്ക് നിക്ഷേപം സ്വീകരിച്ചത് എല്‍എല്‍പി വ്യവസ്ഥയിലാണ്. എല്‍എല്‍പി വ്യവസ്ഥയില്‍ നിക്ഷേപം സ്വീകരിച്ചാല്‍ നിക്ഷേപകര്‍ക്ക് കമ്പിനിയുടെ ലാഭ വിഹിതമാണ് കിട്ടുക. കമ്പിനി നഷ്ടത്തിലായാല്‍ ആനുപാതികമായി നിക്ഷേപകരുടെ പണവും നഷ്ടപ്പെടും. എന്നാല്‍ പണം സ്വീകരിക്കുന്നത് ഈ വ്യവസ്ഥയിലാണെന്ന് ഒരു ഘട്ടത്തില്‍ പോലും നിക്ഷേപകരെ അറിയിച്ചിരുന്നില്ല.
