കൊല്ലം : ടോള് തങ്ങള്ക്ക് ബാധകമല്ലന്ന വാദം ഉന്നയിച്ച് കൊല്ലം ബൈപ്പാസിലെ ടോള് പ്ലാസയില് പോപ്പുലര്ഫ്രണ്ട് പ്രവര്ത്തകരുടെ അഴിഞ്ഞാട്ടം. വനിതാ ജീവനക്കാരെ അടക്കം അസഭ്യം പറഞ്ഞ പ്രവര്ത്തകര് ബൈപ്പാസില് ഒരു മണിക്കൂറോളം ഗതാഗതം സ്തംഭിപ്പിച്ചു. ഉന്നതപോലീസ് ഉദ്യേഗസ്ഥരടക്കം എത്തിയാണ് ഒടുവില് ഗതാഗതം പുനസ്ഥാപിച്ചത്. പോപ്പുലര്ഫ്രണ്ട് ആലപ്പുഴയില് സംഘടിപ്പിച്ച ജനമഹാസമ്മേളനത്തില് പങ്കെടുക്കാനായി തിരുവനന്തപുരം ജില്ലയില് നിന്ന് എത്തിയവരാണ് പ്രശ്നങ്ങള് സൃഷ്ടിച്ചത്. ടോള് തങ്ങള്ക്ക് ബാധകമല്ലന്ന വാദം ഉന്നയിച്ച് പ്രവര്ത്തകര് രംഗത്തെത്തിയതോടെ ജീവനക്കാരും പ്രവര്ത്തകരും തമ്മില് തര്ക്കമായി. ഇതോടെ പോപ്പുലര്ഫ്രണ്ട് പ്രവര്ത്തകര് വനിതാ ജീവനക്കാരെ അടക്കം അസഭ്യം പറയുകയായിരുന്നു.
മറ്റ് രാഷ്ട്രീയ പാര്ട്ടികാരില്നിന്ന് ടോള് ഈടാക്കുന്നില്ലന്നായിരുന്നു പോപ്പുലര്ഫ്രണ്ട് പ്രവര്ത്തകരുടെ വാദം. എന്നാല് മറ്റ് രാഷ്ട്രീയ പാര്ട്ടികളും ടോള് ഫീസ് നല്കാറുണ്ടെന്നും മനപ്പൂര്വ്വം പ്രശ്നം സൃഷ്ടിക്കുകയും ജനശ്രദ്ധ പിടിച്ചുപറ്റുകയുമായിരുന്നു പോപ്പുലര്ഫ്രണ്ട് പ്രവര്ത്തകരുടെ ലക്ഷ്യമെന്നാണ് ജീവനക്കാര് പറയുന്നത്.
തര്ക്കത്തെ തുടര്ന്ന് വാഹനങ്ങള് ടോള് ഗേറ്റിന് പിന്നില് കൂട്ടത്തോടെ നിര്ത്തിയിട്ടതോടെ ബൈപ്പാസില് ഒരുമണിക്കൂറോളം ഗതാഗതം തടസപ്പെട്ടു. വിവരമറിഞ്ഞെത്തിയ പോലീസിനോടും പ്രവര്ത്തകര് തട്ടികയറിയതോടെ സംഘര്ഷാവസ്ഥയായി. പിന്നീട് എ.സി.പിയടക്കമുള്ള ഉന്നത പോലീസ് ഉദ്യോഗസ്ഥരടക്കം എത്തിയാണ് ഗതാഗതം പുനസ്ഥാപിച്ചത്.
