പത്തനംതിട്ട : മതവൈര്യം ഉണ്ടാക്കുന്നതും സാമൂഹിക അകലം തകര്ക്കുന്നതുമായ രീതിയില് വര്ഗീയ പ്രഭാഷണം നടത്തിയ മുന് എംഎല്എ പി സി ജോര്ജ്ജിനെതിരെ പോപുലര് ഫ്രണ്ട് ഓഫ് ഇന്ത്യ പരാതി നല്കി. ഹിന്ദു മഹാ പരിഷത്ത് തിരുവനന്തപുരത്ത് നടത്തുന്ന അനന്തപുരി ഹിന്ദു മഹാസമ്മേളനം ഉദ്ഘാടന പ്രസംഗത്തിലാണ് വര്ഗീയ പരാമര്ശം നടത്തിയത്. കച്ചവടം ചെയ്യുന്ന മുസ്ലിംങ്ങള് പാനീയങ്ങളില് വന്ധ്യത വരുത്താനുള്ള മരുന്നുകള് ബോധപൂര്വ്വം കലര്ത്തുന്നുവെന്നും മുസ്ലിംങ്ങള് അവരുടെ ജനസംഖ്യ വര്ദ്ധിപ്പിച്ച് ഇതൊരു മുസ്ലിം രാജ്യമാക്കി മാറ്റാന് ശ്രമിക്കുന്നുവെന്നുമുള്ള ഗുരുതര ആരോപണങ്ങളാണ് പി സി ജോര്ജ് ഉന്നയിച്ചത്.
മുസ്ലിം പുരോഹിതര് ഭക്ഷണത്തില് മൂന്ന് പ്രാവശ്യം തുപ്പിയ ശേഷം വിതരണം ചെയ്യുന്നു. മുസ്ലിംങ്ങളായ കച്ചവടക്കാര് അവരുടെ സ്ഥാപനങ്ങള് അമുസ്ലിം മേഖലകളില് സ്ഥാപിച്ച് അവരുടെ സമ്പത്ത് കവര്ന്നു കൊണ്ടുപോകുന്നു എന്നൊക്കെയുള്ള അധിക്ഷേപ പ്രസംഗങ്ങള് സമൂഹത്തില് ചേരിതിരിവുണ്ടാക്കാനുള്ള പരിശ്രമങ്ങളാണെന്നും പരാതിയില് പറയുന്നു. ഇത്തരം പ്രസ്താവന നടത്തിയ പി സി ജോര്ജിനെതിരെ ശക്തമായ നിയമനടപടികള് സ്വീകരിക്കേണ്ടത് നമ്മുടെ നാട്ടില് ക്രമസമാധാനവും മതസൗഹാര്ദ്ധവും നിലനിര്ത്താന് അനിവാര്യമാണെന്ന് പോപുലര് ഫ്രണ്ട് ഓഫ് ഇന്ത്യ പത്തനംതിട്ട ജില്ലാ സെക്രട്ടറി സാദിക്ക് അഹമ്മദ് പത്തനംതിട്ട ഡിവൈഎസ്പിക്ക് നല്കിയ പരാതിയില് ചൂണ്ടിക്കാട്ടുന്നു.
