തിരുവനന്തപുരം : ട്രെയിനുകള് വഴിയുള്ള തപാല് ഉരുപ്പടികളുടെ നീക്കം നിര്ത്തുന്നതിന്റെ ആദ്യ പടിയായി തിരുവനന്തപുരം- മംഗളൂരു കണ്ണൂര് എക്സ്പ്രസില് ഇത്തരം സാമഗ്രികള് കൊണ്ടുപോയിരുന്ന ബോഗി ഒഴിവാക്കി. ബോഗികള് ബുക്കു ചെയ്യുന്നത് ഭീമമായ നഷ്ടത്തിനിടയാക്കുന്നുവെന്ന കാരണം ചൂണ്ടിക്കാട്ടിയാണ് തീരുമാനം.
തിരുവനന്തപുരം – മംഗളൂരു മലബാര് എക്സ്പ്രസ്, കന്യാകുമാരി- ബെംഗളൂരു ഐലന്ഡ് എക്സ്പ്രസ് എന്നിവയിലെ ബോഗികള് ഉടനെ നിര്ത്തലാക്കും. കൊല്ലം- ചെന്നൈ എക്സ്പ്രസിലെ ബോഗി നേരത്തേ ഉപേക്ഷിച്ചിരുന്നു.
നേത്രാവതി, വേണാട് എക്സ്പ്രസുകളില് ബോഗിക്കു പകരം സീറ്റുകള് ബുക്ക് ചെയ്ത് തപാല് കൊണ്ടുപോകുന്ന സംവിധാനം കുറച്ചുകാലത്തേക്കു കൂടി തുടരും. യാത്രക്കാര് കയറുന്ന കോച്ചുകളില് പ്രത്യേകം വേര്തിരിച്ചായിരിക്കും തപാല് കൊണ്ടുപോവുക.
കത്തുകള് ട്രെയിനിനകത്തു തന്നെ തരംതിരിച്ച് മേല് വിലാസക്കാര്ക്ക് പെട്ടെന്ന് എത്തിക്കുന്ന സോര്ട്ടിങ് സംവിധാനം തപാല് വകുപ്പ് നിര്ത്തലാക്കിയിരുന്നു. റെയില്വേയെ അകറ്റുന്നതിലൂടെ നിലവിലെ 22 ആര്എംഎസുകളുടെ എണ്ണം എട്ടായി ചുരുങ്ങും. തിരുവനന്തപുരം, തിരുവല്ല, കോട്ടയം, എറണാകുളം, തൃശൂര്, പാലക്കാട്, കോഴിക്കോട്, കണ്ണൂര് എന്നിവ മാത്രം നിലനിര്ത്താനാണ് തീരുമാനം.