ചെങ്ങന്നൂര് : നഗരസഭ ചെയര്പേഴ്സന്, മുന് ചെയര്മാന്മാരായ കൗണ്സിലര്മാര് എന്നിവര്ക്കെതിരെ തിരുവനന്തപുരത്തെ ഗ്രാമ – നഗരകാര്യ വികസന കമീഷണറുടെ കാര്യാലയത്തിന് മുന്നിലെ മതിലില് പോസ്റ്റര്. ഡിസംബറില് യു.ഡി.എഫ് പാര്ലമെന്ററി പാര്ട്ടി നഗരസഭ സെക്രട്ടറിക്കെതിരെ തലസ്ഥാനത്ത് നടത്തിയ സമരത്തിന് മുന്നോടിയായി ഇതേ സ്ഥലത്താണ് പോസ്റ്റര് പതിച്ചിരുന്നത്. സെക്രട്ടറി എസ്.നാരായണനെ സര്വിസില്നിന്ന് പിരിച്ചു വിടണമെന്നാവശ്യപ്പെട്ടായിരുന്നു അന്നത്തെ സമരം. ചെയര്പേഴ്സന് മറിയാമ്മ ജോണ് ഫിലിപ്, മുന് ചെയര്മാന്മാരായ രാജന് കണ്ണാട്ട്, കെ. ഷിബു രാജന് എന്നിവര്ക്കെതിരായ അഴിമതിക്കഥകളാണ് ഇപ്പോള് പോസ്റ്ററില് രേഖപ്പെടുത്തിയിരിക്കുന്നത്. ചെങ്ങന്നൂരില് ഒതുങ്ങി നിന്ന അഴിമതി ആരോപണങ്ങളാണ് ഇപ്പോള് തലസ്ഥാനത്തും ചര്ച്ചയാകുന്നത്.
