ആറന്മുള : നിയമസഭാ തെരഞ്ഞെടുപ്പിന് മുന്നോടിയായി ആറന്മുള മണ്ഡലത്തില് കോണ്ഗ്രസിനുള്ളില് ഗ്രൂപ്പ് പോര് മുറുകുന്നു. യൂത്ത് കോണ്ഗ്രസ് നേതാവ് അബിന് വര്ക്കിയെ സ്ഥാനാര്ഥിയാക്കാനുള്ള നീക്കത്തിനെതിരെ ആറന്മുള മണ്ഡലത്തില് വ്യാപകമായി പ്രതിഷേധ പോസ്റ്ററുകള് പ്രത്യക്ഷപ്പെട്ടു. അബിന് വര്ക്കിയെ പത്തനംതിട്ടയില് വേണ്ട എന്ന വാചകങ്ങളുമായാണ് പോസ്റ്റര് പ്രത്യക്ഷപ്പെട്ടിരിക്കുന്നത്. ആറന്മുള, ഓമല്ലൂര്, ചെന്നീര്ക്കര, ഇലന്തൂര്, കോഴഞ്ചേരി തുടങ്ങിയ വിവിധ സ്ഥലങ്ങളിലും പത്തനംതിട്ട ഡി.സി.സി ഓഫീസ്, പ്രസ് ക്ലബ് പരിസരം എന്നിവടങ്ങളിലുമാണ് പോസ്റ്ററുകള് പതിച്ചിട്ടുള്ളത്.
പുറത്ത് നിന്നുള്ള സ്ഥാനാര്ഥികളെ മണ്ഡലത്തില് കെട്ടിയിറക്കാന് അനുവദിക്കില്ല എന്ന പ്രാദേശിക നേതാക്കളുടെയും പ്രവര്ത്തകരുടെയും വികാരമാണ് ഇതിലൂടെ പ്രകടമാകുന്നത്. നേരത്തെ ഡി.സി.സി യോഗത്തില് ഭൂരിഭാഗം നേതാക്കളും ഇത്തരം സ്ഥാനാര്ഥികള്ക്ക് എതിരെ ശക്തമായ നിലപാട് സ്വീകരിച്ചിരുന്നു. ഇതിനിടെയിലാണ് അബിന് വര്ക്കി മണ്ഡലത്തില് സജീവമാകാന് ശ്രമിച്ചത്. ഇത് പ്രാദേശിക നേതൃത്വത്തെ ചൊടിപ്പിച്ചിരിക്കുകയാണ്. അബിന് വര്ക്കിയുടെ സ്ഥാനാര്ഥിത്വത്തില് പ്രതിഷേധിച്ച് ഒരു വിഭാഗം കോണ്ഗ്രസ് നേതാക്കള് കഴിഞ്ഞ ദിവസം എ.ഐ.സി.സി ജനറല് സെക്രട്ടറി കെ.സി വേണുഗോപാലിനെ കണ്ട് അതൃപ്തി അറിയിച്ചിരുന്നു.
