പന്തളം : പന്തളം തെക്കേക്കര പഞ്ചായത്തിലൂടെ കടന്നുപോകുന്ന തുമ്പമണ് – ആനന്ദപ്പള്ളി റോഡ് തകര്ച്ച നേരിട്ടതോടെ ഇവിടെ ഇരുചക്ര വാഹന യാത്രക്കാര് അപകടത്തില്പ്പെടുന്നത് പതിവാകുന്നു. കീരുകുഴി ഭാഗത്താണ് ഏറ്റവും കൂടുതല് തകര്ച്ച നേരിട്ടിട്ടുള്ളത്. മഴക്കാലമായതോടെ ചെളി നിറഞ്ഞ റോഡില് കൂടി നടക്കുവാന് പോലും സാധിക്കാത്ത അവസ്ഥയാണ് നിലവിലുള്ളത്. തകര്ന്ന് കിടക്കുന്ന റോഡിന്റെ പരിസരത്തായി അഞ്ച് സ്കൂളുകള് നിലവില് പ്രവര്ത്തിക്കുന്നുണ്ട്. ഈ സ്കൂളിലേക്ക് പോകുന്ന വിദ്യാര്ഥികള് ഈ ചെളി വെള്ളത്തില് ചവിട്ടിയാണ് നടക്കുന്നത്. രാത്രി സമയങ്ങളില് കുഴികള് ശ്രദ്ധിക്കാതെ ഒട്ടേറെ ഇരുചക്ര വാഹന യാത്രക്കാരും ഇവിടെ അപകടത്തില്പ്പെട്ടിട്ടുണ്ട്.
കാലങ്ങളായി തകര്ന്നു കിടക്കുന്ന റോഡിന്റെ ശോചനീയാവസ്ഥ എം.എല്.എ അടക്കമുള്ള ജനപ്രതിനിധികളെ നാട്ടുകാര് പല തവണ അറിയിക്കുകയും പരാതി നല്കുകയും ചെയ്തിട്ടും യാതൊരു പ്രയോജനവും ലഭിച്ചില്ല. തകര്ന്നു കിടക്കുന്ന റോഡിന് ഇരുവശത്തെയും വ്യാപാരികളും ഇത് മൂലം ഏറെ ബുദ്ധിമുട്ട് നേരിടുന്നുണ്ട്. വ്യാപാര സ്ഥാപനങ്ങള്ക്ക് മുന്പില് ചെളി നിറഞ്ഞു കിടക്കുന്നതിനാല് ആളുകള് കയറാന് മടിക്കുന്നതായാണ് വ്യാപാരികളുടെ പരാതി. വലിയ അപകടങ്ങള് നടന്നുവെങ്കില് മാത്രമേ റോഡ് പുനരുദ്ധരിക്കാന് അധികാരികള് തയാറാവുകയുള്ളോ എന്നാണ് നാട്ടുകാരുടെ ചോദ്യം.
