മല്ലപ്പള്ളി : മൂശാരിക്കവല, പരിയാരം പ്രദേശങ്ങളിലെ വൈദ്യുതി മുടക്കം ജനജീവിതം ദുസഹമാക്കുന്നതായി പരാതി ഉയരുന്നു. പ്രഖ്യാപിത, അപ്രഖ്യാപിത വൈദ്യുതി മുടക്കം പതിവായിരിക്കുകയാണ്. രണ്ടാഴ്ചയിലേറെയായി രാവിലെ ഒൻപതിന്റെ വൈദ്യുതിലൈനിലെ പണികളുടെ പേരിൽ വൈകിട്ട് അഞ്ച് വരെ വൈദ്യുതി മുടക്കും. തുടർച്ചയായുള്ള ദിവസങ്ങളിലെ വൈദ്യുതി മുടക്കം നാട്ടുകാരെ വലക്കുന്നു. മിക്കപ്പോഴും പറഞ്ഞ സമയത്ത് വൈദ്യുതി പുനസ്ഥാപിക്കാറുമില്ല. വന്നാൽ ഉടൻ തന്നെ വൈദ്യുതി ഇല്ലാതാകുന്ന അവസ്ഥയുമാണ്. പതിവായുള്ള വൈദ്യുതി മുടക്കം വ്യാപാര സ്ഥാപനങ്ങൾക്കും ഗാർഹിക ഉപഭോക്താക്കൾക്കും ദുരിതമായിരിക്കുകയാണ്. വൈദ്യുതി മുടക്കം ഒഴിവാക്കാൻ നടപടി വേണമെന്നാണ് നാട്ടുകാരുടെ ആവശ്യം.
