കാസര്കോട് : പ്രവാസി യുവാവിനെ തട്ടിക്കൊണ്ടുപോയി കൊലപ്പെടുത്തിയ കേസില് നിര്ണായക വിവരങ്ങള് പുറത്ത്. പുത്തിഗെ മുഗു റോഡ് സ്വദേശി അബൂബക്കര് സിദ്ദിഖാണ് കൊല്ലപ്പെട്ടത്. ഡോളര് കടത്തിയതുമായി ബന്ധപ്പെട്ടുണ്ടായ തര്ക്കമാണ് കൊലപാതകത്തിലേക്ക് നയിച്ചതെന്നാണ് സൂചന. സിദ്ദിഖിന്റെ സഹോദരന് അന്വറിനെയും സുഹൃത്ത് അന്സാരിയേയും ഒരു സംഘം നേരത്തെ തട്ടിക്കൊണ്ടുപോയിരുന്നു. ഇവരെ വിട്ടുകിട്ടണമെങ്കില് സിദ്ദിഖ് നാട്ടിലെത്തണമെന്ന് പ്രതികള് ഭീഷണിപ്പെടുത്തി. ഇന്നലെയാണ് സിദ്ദിഖ് ഗള്ഫില് നിന്ന് എത്തിയത്.
കുറച്ച് സംസാരിക്കാനുണ്ടെന്ന് പറഞ്ഞ് ഉച്ചയോടുകൂടി സിദ്ദിഖിനെ പ്രതികള് കാറില് കയറ്റിക്കൊണ്ടുപോയി. പിന്നീട് മര്ദിച്ച് അവശനാക്കി സ്വകാര്യ ആശുപത്രിയില് ഉപേക്ഷിക്കുകയായിരുന്നു. അപ്പോഴേക്ക് മരണം സംഭവിച്ചിരുന്നു. ഗുരുതരാവസ്ഥയിലുള്ള സിദ്ദിഖിന്റെ സഹോദരനെയും ഇവര് ആശുപത്രിയില് ഉപേക്ഷിച്ചു. അന്സാരിയെക്കുറിച്ചുള്ള വിവരങ്ങള് വ്യക്തമല്ല. കൊലയാളി സംഘത്തെ തിരിച്ചറിഞ്ഞതായി പോലീസ് അറിയിച്ചു. പത്തംഗ സംഘമാണ് കൊലയ്ക്ക് പിന്നില്. ഷാഫി, റായിസ് എന്നിവരാണ് കൊലയ്ക്ക് നേതൃത്വം നല്കിയതെന്ന് പോലീസ് അറിയിച്ചു.
