പത്തനംതിട്ട: അബുദാബിയില്നിന്ന് വ്യാഴാഴ്ച രാത്രി പത്തനംതിട്ടയില് എത്തിയ ഏഴു പ്രവാസികളില് നാലു പേരെ നിരീക്ഷണലാക്കി. എയര് ഇന്ത്യ എക്സ് പ്രസ്സ് വിമാനത്തില് നെടുമ്പാശേരി വിമാനത്താവളത്തില് വന്ന നാലു പേരെയാണ് റാന്നിയിലെ റാന്നി ഗേറ്റ് റസിഡന്സി കോവിഡ് നിരീക്ഷണ കേന്ദ്രത്തില് എത്തിച്ചത്.
ഇതില് രണ്ടു പുരുഷന്മാരും രണ്ട് സ്ത്രീകളും ഉള്പ്പെടുന്നു. കുറിയന്നൂര്, പെരിങ്ങര, വെച്ചൂച്ചിറ, വായ്പൂര് സ്വദേശികളാണിവര്. ഗര്ഭിണികളായ നെടുബ്രം, ഇരവിപേരൂര് സ്വദേശിനികള് വിമാനത്താവളത്തില് നിന്ന് ടാക്സിയില് വീടുകളില് എത്തി നിരീക്ഷണത്തിലായി. പിതാവിന്റെ സംസ്കാരവുമായി ബന്ധപ്പെട്ട് ദുബായിയില് നിന്നും എയര് ഇന്ത്യ എക്സ് പ്രസ്സ് വിമാനത്തില് കോഴിക്കോട് അന്താരാഷ്ട്ര വിമാനത്താവളത്തില് എത്തിയ ചിറ്റാര് സ്വദേശി ആംബുലന്സില് ചിറ്റാറിലെ വീട്ടില് എത്തി നിരീക്ഷണത്തിലായി.
കോട്ടയം, പത്തനംതിട്ട ജില്ലകളില് നിന്നുള്ളവരുടെ യാത്ര ഒരേ കെ.എസ്.ആര്.ടി.സി ബസിലായിരുന്നു. കോട്ടയം ജില്ലയിലുള്ളവരെ അവിടെ ഇറക്കിയ ശേഷം പുലര്ച്ചെ 4.53-ന് ബസ് പത്തനംതിട്ട സെന്റ് പീറ്റേഴ്സ് ജംഗ്ഷനിലെത്തി. ജില്ലാ കളക്ടര് പി.ബി. നൂഹ് പ്രവാസികളെ സ്വീകരിച്ചു. തുടര്ന്ന് 5.25-ന് നാലു പേരെയും റാന്നിയിലെത്തിച്ചു.
പത്തനംതിട്ട ജില്ലയില് നിന്നുള്ള ഏഴു പേര് ഉള്പ്പെടെ 149 പ്രവാസികളുമായി റിയാദില് നിന്ന് പ്രത്യേക വിമാനം വെള്ളിയാഴ്ച രാത്രി 8.30-ന് കരിപ്പൂരിലെ കോഴിക്കോട് അന്താരാഷ്ട്ര വിമാനത്താവളത്തിലെത്തും. മേയ് 10-ന് രാത്രി 10.45ന് ദോഹയില് നിന്നുള്ള വിമാനം തിരുവനന്തപുരം അന്താരാഷ്ട്ര വിമാനത്താവളത്തിലെത്തും. പത്തനംതിട്ട ജില്ലയില് നിന്നുള്ളവര് ഉള്പ്പെടെ 200 യാത്രക്കാരുണ്ടാകും.