പത്തനംതിട്ട : പ്രയാർ നിസ്വാർത്ഥനായ കർമ്മയോഗി. തന്ത്രി മണ്ഡലം. പ്രവർത്തിച്ച എല്ലാ മേഖലകളിലും തന്റേതായ വ്യക്തിമുദ്ര പതിപ്പിച്ച പ്രയാർ ഗോപാലകൃഷ്ണൻ സംശുദ്ധ രാഷ്ട്രീയത്തിന്റെ വക്താവും ആചാര സംരക്ഷണത്തിന് വേണ്ടി വിട്ടുവീഴ്ചയില്ലാത്ത നിലപാട് സ്വീകരിച്ച് ഭക്തജനങ്ങളുടെ മിത്രവുമായ സാത്വിക കർമ്മയോഗി ആയിരുന്നു എന്ന് തന്ത്രി മണ്ഡലം സംസ്ഥാന നേതൃയോഗം അനുസ്മരിച്ചു. അഖില കേരള തന്ത്രി മണ്ഡലത്തിന്റേയും തന്ത്രി മണ്ഡല വിദ്യാപീഠത്തിന്റേയും അഭ്യുദയകാംക്ഷി ആയിരുന്ന പ്രയാർ ഗോപാലകൃഷ്ണന്റെ പേരിൽ അഖിലേന്ത്യാ സിവിൽ സർവ്വീസ് പരീക്ഷയിൽ ഏറ്റവും മുന്നിലെത്തുന്ന മലയാളി വിദ്യാർത്ഥിയ്ക്ക് പുരസ്കാരം ഏർപ്പെടുത്താനും നേതൃയോഗം തീരുമാനിച്ചു.
തന്ത്രി മണ്ഡലം നടത്തിയ പ്രയാർ ഗോപാലകൃഷ്ണൻ അനുസ്മരണ യോഗത്തിൽ സംസ്ഥാന പ്രസിഡന്റ് പ്രൊഫ.വി.ആർ നമ്പൂതിരി അധ്യക്ഷത വഹിച്ചു. വൈസ് പ്രസിഡന്റ് വാഴയിൽ മഠം വിഷ്ണു നമ്പൂതിരി, ജനറൽ സെക്രട്ടറി എസ്.രാധാകൃഷ്ണൻ പോറ്റി, ട്രഷറർ പാൽക്കുളങ്ങര ഗണപതി പോറ്റി, രജിസ്ട്രാർ ദിലീപൻനാരായണൻ നമ്പൂതിരി, സി.ആർ.ഓ വാമനൻ നമ്പൂതിരി, സംസ്ഥാന നിർവ്വാഹക സമിതിയംഗങ്ങളായ രാജേഷ് കിഴക്കില്ലം, പകൽക്കുറി ഈശ്വരൻ നമ്പൂതിരി, തിരുവനന്തപുരം ജില്ലാ സെക്രട്ടറി എൻ.മഹാദേവൻ പോറ്റി, നീലകണ്ഠൻ നമ്പൂതിരി, കുനി കേശവൻ നമ്പൂതിരി, നീലമന പ്രശാന്ത് നമ്പൂതിരി എന്നിവർ പ്രയാർ ഗോപാലകൃഷ്ണനെ അനുസ്മരിച്ച് സംസാരിച്ചു.
