തിരുവനന്തപുരം : പ്രസവത്തിനായി ആശുപത്രിയില് പ്രവേശിപ്പിച്ച യുവതിയും ഗര്ഭസ്ഥ ശിശുവും മരിച്ച സംഭവത്തില് തമ്പാനൂര് പോലീസ് രജിസ്റ്റര് ചെയ്ത കേസില് വിശദവും കാര്യക്ഷമവുമായ അന്വേഷണം വേണമെന്ന് മനുഷ്യാവകാശ കമ്മീഷന്. യുവതിയുടെ അമ്മ തമ്പാനൂര് പോലീസ് ഇന്സ്പെക്ടര്ക്ക് നല്കിയ പരാതിയില് സ്വീകരിച്ച നടപടികള് വിശദമാക്കി ഒരു റിപ്പോര്ട്ട് ജൂലൈ 25 നകം സമര്പ്പിക്കണമെന്ന് കമ്മീഷന് അധ്യക്ഷന് ജസ്റ്റിസ് ആന്റണി ഡൊമിനിക്ക് ആവശ്യപ്പെട്ടു. യുവതിയുടെ മരണത്തിനുള്ള കാരണങ്ങളും ചികിത്സയും സംബന്ധിച്ച് വിശദമായ റിപ്പോര്ട്ട് ജില്ലാ മെഡിക്കല് ഓഫീസറും സമര്പ്പിക്കണം. കേസ് ജൂലൈ 25 ന് പരിഗണിക്കും.
കല്ലിയൂര് തെറ്റിവിള സ്വദേശിനി ബീന നല്കിയ പരാതിയിലാണ് നടപടി. പരാതിക്കാരിയുടെ മകള് രേവതി (29) 2021 ഓഗസ്റ്റ് 10 നാണ് എസ് എ റ്റി ആശുപത്രിയില് മരിച്ചത്. 10 ന് രാവിലെയാണ് തൈക്കാട് ആശുപത്രിയില് പ്രവേശിപ്പിച്ചിരുന്ന രേവതിയെ ഗുരുതരാവസ്ഥയില് ആശുപത്രി അധികൃതര് നേരിട്ട് എസ് എ റ്റി ആശുപത്രിയിലെത്തിച്ചത്. തൈക്കാട് ആശുപത്രിയില് രേവതിയെ ചികിത്സിച്ച ഡോക്ടറെ ഒന്നാം പ്രതിയായും ഡ്യൂട്ടി മെഡിക്കല് ഓഫീസറെ രണ്ടാം പ്രതിയായും തമ്പാനൂര് പോലീസ് എഫ് ഐ ആര് രജിസ്റ്റര് ചെയ്തിരുന്നതായി പരാതിയില് പറയുന്നു. എന്നാല് അതിനു ശേഷം യാതൊരു നടപടിയും പോലീസ് സ്വീകരിച്ചില്ലെന്ന് പരാതിയില് പറയുന്നു. രേവതിയുടെ മരണ സര്ട്ടിഫിക്കറ്റ് നഗരസഭ നല്കിയിട്ടില്ല. ആശുപത്രി മരണ വിവരം അറിയിച്ചിട്ടില്ലെന്നാണ് നഗരസഭയുടെ വിശദീകരണമെന്ന് പരാതിയില് പറയുന്നു.