കോഴിക്കോട് : ചെറുവണ്ണൂർ തെയ്യപ്പുറത്ത് ഓടിക്കൊണ്ടിരുന്ന കാറിന് തീപിടിച്ച് ഏഴ് മാസം ഗർഭിണിയായ യുവതി മരിച്ചു. ചെറുവണ്ണൂർ സ്വദേശി റിജിൻ ലാലിന്റെ ഭാര്യ സോന (30) ആണ് ഈ ദാരുണമായ അപകടത്തിൽ മരിച്ചത്. അപകടത്തിൽ ഗുരുതരമായി പൊള്ളലേറ്റ ഭർത്താവ് റിജിൻ ലാൽ ഇപ്പോൾ കോഴിക്കോട് മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. ഇന്നലെ രാത്രി ഒൻപതേകാലോടെ പേരാമ്പ്ര ചെറുവണ്ണൂരിലെ കക്കറമുക്കിലായിരുന്നു അപകടം നടന്നത്. ആശുപത്രിയിൽ ചികിത്സ തേടിയ ശേഷം വീട്ടിലേക്ക് മടങ്ങുന്നതിനിടെ വീടിന് അല്പം മാത്രം അകലെ വെച്ച് കാറിൽ നിന്ന് പുകയും തീയും ഉയരുകയായിരുന്നു.
കാറിൽ തീ പടരുന്നത് കണ്ട നാട്ടുകാർ ഓടിയെത്തി സമീപത്തെ വയലിൽ നിന്നും വെള്ളം കോരിയൊഴിച്ച് തീ അണയ്ക്കാൻ ശ്രമിച്ചു. പേരാമ്പ്രയിൽ നിന്നും ഫയർഫോഴ്സ് എത്തുന്നതിന് മുൻപ് തന്നെ നാട്ടുകാർ ചേർന്ന് കാറിലുണ്ടായിരുന്ന രണ്ടുപേരെയും പുറത്തെടുത്തെങ്കിലും അപ്പോഴേക്കും സോന മരിച്ചിരുന്നു. ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനമെങ്കിലും ഇക്കാര്യത്തിൽ ഔദ്യോഗികമായ സ്ഥിരീകരണത്തിനായി അന്വേഷണം പുരോഗമിക്കുകയാണ്. സോനയുടെ മൃതദേഹം പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.
