പത്തനംതിട്ട : വിലക്കയറ്റം രൂക്ഷമാകുമ്പോഴും വിപണിയിൽ ഇടപെടേണ്ട സർക്കാർ തുടരുന്ന നിർബന്ധിത മൗനം പ്രതിഷേധാർഹമെന്ന് എസ്ഡിപിഐ പത്തനംതിട്ട ജില്ലാ ജനറൽ സെക്രട്ടറി സലീം മൗലവി. വിലക്കയറ്റം നിയന്ത്രിക്കണമെന്ന് ആവശ്യപ്പെട്ട് ജൂലൈ 29 ചൊവ്വാഴ്ച ബ്രാഞ്ച് തലങ്ങളിൽ പ്രതിഷേധം സംഘടിപ്പിക്കുമെന്നും അദ്ദേഹം പറഞ്ഞു. വിലക്കയറ്റം തടയുക, ജനങ്ങളുടെ ദുരിതം അകറ്റുക, കേന്ദ്ര-സംസ്ഥാന സർക്കാരുകളുടെ നിസ്സംഗത അവസാനിപ്പിക്കുക തുടങ്ങിയ മുദ്രാവാക്യങ്ങൾ ഉയർത്തിയാണ് പ്രതിഷേധം നടത്തുക. സംസ്ഥാനത്ത് അവിശ്യസാധനങ്ങളുടെ വില കുതിച്ചുയരുകയാണ്. വെളിച്ചെണ്ണയുടെ വില 500ലേക്ക് അടുക്കുന്നു.
പയർ വർഗ്ഗങ്ങൾക്കും പച്ചക്കറിക്കും പൊള്ളുന്ന വിലയാണ്. വില കുതിച്ചുയരുമ്പോഴും പൊതുവിപണിയിൽ ഇടപെടുന്നതിനോ ബദൽ മാർഗ്ഗങ്ങൾ തേടുന്നതിനോ സർക്കാർ തയ്യാറായിട്ടില്ല. പ്രതിപക്ഷ പാർട്ടികളും മൗനത്തിലാണ്. ജനങ്ങളെ ബാധിക്കുന്ന വിഷയങ്ങളിൽ നിന്നും ഭരണകൂടങ്ങളും പ്രതിപക്ഷ പാർട്ടികളും ഒളിച്ചോടുകയാണ്. സാധാരണക്കാരന്റെ കഞ്ഞിയിൽ മണ്ണുവാരിയിടുന്ന സമീപനം സർക്കാർ അവസാനിപ്പിക്കണം. ഈ സാഹചര്യത്തിൽ സർക്കാർ അടിയന്തിരമായി വിപണിയിൽ ഇടപെട്ടുകൊണ്ട് വിലക്കയറ്റം പിടിച്ചുനിർത്താൻ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.
