ഡൽഹി : രാജ്യത്തെ ഇന്ധന ലഭ്യതയിൽ കുറവുണ്ടാകാൻ സാധ്യതയുള്ള സാഹചര്യത്തിൽ പൗരന്മാർക്ക് കർശന നിയന്ത്രണ നിർദേശങ്ങളുമായി പ്രധാനമന്ത്രി നരേന്ദ്ര മോദി. ഹൈദരാബാദിൽ നടന്ന പൊതുസമ്മേളനത്തിലാണ് രാജ്യത്തെ സാമ്പത്തിക-ഇന്ധന പ്രതിസന്ധികളുടെ പശ്ചാത്തലത്തിൽ പ്രധാനമന്ത്രി ഈക്കാര്യം അറിയിച്ചത്. പെട്രോൾ, ഡീസൽ ഉപഭോഗം പരമാവധി കുറയ്ക്കണമെന്ന് അദ്ദേഹം ആവശ്യപ്പെട്ടു. ഇതിനായി കാർപൂളിംഗ് രീതികൾ അവലംബിക്കാനും പൊതുഗതാഗത സംവിധാനങ്ങളെ കൂടുതൽ ആശ്രയിക്കാനും നിർദേശമുണ്ട്. അടുത്ത ഒരു വർഷത്തേക്ക് സ്വർണം വാങ്ങുന്നത് പരമാവധി ഒഴിവാക്കണമെന്ന് പ്രധാനമന്ത്രി ആവശ്യപ്പെട്ടു.
രാജ്യത്തിന്റെ വിദേശനാണ്യ ശേഖരത്തിൽ കുറവുണ്ടാകാതിരിക്കാൻ വിദേശ ഉൽപ്പന്നങ്ങൾ വാങ്ങുന്നത് കുറയ്ക്കണമെന്നും അദ്ദേഹം ഓർമ്മിപ്പിച്ചു. യാത്രാ ചെലവുകളും ഇന്ധന ഉപഭോഗവും കുറയ്ക്കുന്നതിന്റെ ഭാഗമായി വർക്ക് ഫ്രം ഹോം രീതി പരമാവധി പ്രോത്സാഹിപ്പിക്കാൻ നിർദേശമുണ്ട്. അനാവശ്യമായ വിദേശയാത്രകൾ ഒഴിവാക്കണമെന്നും കോവിഡ് കാലഘട്ടത്തിന് സമാനമായ ജീവിതരീതികൾ സ്വീകരിക്കണമെന്നും അദ്ദേഹം അഭ്യർത്ഥിച്ചു.
