കണ്ണൂർ : വളക്കൈയിൽ ഓടിക്കൊണ്ടിരുന്ന സ്വകാര്യ ബസ് പൂർണ്ണമായും കത്തിനശിച്ചു. ശ്രീകണ്ഠാപുരത്തുനിന്ന് തളിപ്പറമ്പിലേക്ക് പോവുകയായിരുന്ന ബസിനാണ് തീപിടുത്തമുണ്ടായത്. കൃത്യസമയത്ത് യാത്രക്കാർ ബസ്സിൽ നിന്നും ഇറങ്ങി ഓടിയതിനാൽ വൻ ദുരന്തം ഒഴിവായി. ഉച്ചയ്ക്ക് 12:15-ഓടെയാണ് വളക്കൈയിൽ വെച്ച് അപകടം നടന്നത്. ബസ്സിൽ നിന്ന് പെട്ടെന്ന് തീ ആളിപ്പടരുകയായിരുന്നു. നാട്ടുകാർ പൈപ്പുകൾ ഉപയോഗിച്ച് തീയണയ്ക്കാൻ ശ്രമിച്ചെങ്കിലും പരാജയപ്പെട്ടു. അഗ്നിശമന സേന സ്ഥലത്തെത്താൻ ഏകദേശം അരമണിക്കൂർ സമയമെടുത്തു. അപ്പോഴേക്കും ബസ് പൂർണ്ണമായും കത്തി അമർന്നിരുന്നു.
ബസ്സിന്റെ എൻജിൻ ഭാഗവും ടയറുകളും മാത്രമാണ് അവശേഷിച്ചത്. ബസ്സിലെ ഷോർട്ട് സർക്യൂട്ടാണ് അപകടത്തിന് കാരണമായതെന്നാണ് പ്രാഥമിക നിഗമനം. ഈയിടെ സർവീസ് കഴിഞ്ഞ് പുറത്തിറങ്ങിയ ബസ്സിൽ ചില ഇലക്ട്രിക്കൽ ജോലികൾ നടത്തിയിരുന്നതായും ഇതായിരിക്കാം അപകടത്തിലേക്ക് നയിച്ചതെന്നും കരുതപ്പെടുന്നു.
