പന്തളം : പന്തളത്ത് സ്വകാര്യ ബസുകള് തമ്മിലുള്ള മത്സരയോട്ടവും ജീവനക്കാര് തമ്മിലുള്ള സംഘര്ഷവും ജനജീവിതത്തെ സാരമായി ബാധിക്കുന്നു. പന്തളം എന്.എസ്.എസ് കോളജിന് സമീപം സ്വകാര്യ ബസ് മറ്റൊരു ബസില് മനപ്പൂര്വ്വം ഇടിപ്പിച്ചതാണ് ഏറ്റവും ഒടുവിലത്തെ സംഭവം. ദുര്ഗ്ഗ എന്ന സ്വകാര്യ ബസിന്റെ ഡ്രൈവര് പുറകില് കിടന്നിരുന്ന രാഖി എന്ന സ്വകാര്യ ബസില് തന്റെ ബസ്സ് കൊണ്ട് ഇടിക്കുകയായിരുന്നു. സംഭവത്തില് ദുര്ഗ്ഗ ബസിന്റെ ഡ്രൈവര്ക്കും കണ്ടക്ടര്ക്കും എതിരെ പോലീസ് കേസ് രജിസ്റ്റര് ചെയ്തിട്ടുണ്ട്. പന്തളം – കായംകുളം റൂട്ടിലാണ് ഏറ്റവും കൂടുതല് മത്സരയോട്ടം നടക്കുന്നത്. ജില്ലയില് പലയിടത്തും ബസുകള് തമ്മിലുള്ള മത്സരയോട്ടം പതിവാകുകയാണ്. എന്നാല് ഇതിനെതിരെ നടപടി സ്വീകരിക്കുവാന് മോട്ടോര് വാഹന വകുപ്പും പോലീസും തയ്യാറാകുന്നില്ല.
കളക്ഷന് വര്ദ്ധിപ്പിക്കുന്നതിന്റെ ഭാഗമായാണ് ഇത്തരത്തില് മത്സരയോട്ടം നടക്കുന്നത്. എന്നാല് ജനങ്ങളുടെ ജീവന് ഭീഷണിയാകുന്ന രീതിയില് നടക്കുന്ന ഇത്തരം മത്സരയോട്ടങ്ങള് തടയുവാനും നടപടിയില്ല. പൊതുജനങ്ങളുടെ ജീവന് ഭീഷണിയാകുന്ന രീതിയില് ബസ് ഓടിക്കുന്ന ജീവനക്കാര്ക്ക് എതിരെ വധശ്രമം അടക്കമുള്ള വകുപ്പുകള് പ്രകാരം കേസ് രജിസ്റ്റര് ചെയ്യണമെന്നാണ് ആവശ്യമുയരുന്നത്. പല ബസ് റൂട്ടുകളിലും ജീവനക്കാര് തമ്മിലുള്ള തര്ക്കത്തെ തുടര്ന്ന് യാത്രക്കാരാണ് പ്രതിസന്ധിയിലാവുന്നത്. തര്ക്കം നീളുമ്പോള് യാത്രക്കാര് മണിക്കൂറുകളോളം പെരുവഴിയില് കിടക്കേണ്ടി വരാറുണ്ട്.
