തിരുവനന്തപുരം : സംസ്ഥാനത്ത് അനിശ്ചിതകാല സ്വകാര്യ ബസ് സമരം ആരംഭിച്ചു. മിനിമം ചാര്ജ് 12 രൂപയാക്കുക, വിദ്യാര്ത്ഥികളുടെ കണ്സഷന് ചാര്ജ് 6 രൂപ ആക്കുക തുടങ്ങി വിവിധ ആവിശ്യങ്ങള് ഉന്നയിച്ചാണ് ബസ് ഉടമകള് പണിമുടക്ക് നടത്തുന്നത്. കഴിഞ്ഞ നവംബറില് സമരം പ്രഖ്യാപിച്ചെങ്കിലും ഗതാഗത മന്ത്രി ആന്റണി രാജുവുമായി നടത്തിയ ചര്ച്ചയെ തുടര്ന്ന് സമരതീരുമാനം പിന്വലിക്കുകയായിരുന്നു. കെ എസ് ആര് ടി സി ബസ്സുകള് കുറവുള്ള മലബാര് ജില്ലകളില് പണി മുടക്ക് ജനജീവിതത്തെ ബാധിച്ചേക്കും.
ചര്ച്ചയില് ആവശ്യങ്ങള് അംഗീകരിക്കാമെന്ന് പറഞ്ഞെങ്കിലും തീരുമാനം അനന്തമായി നീളുന്ന സാഹചര്യത്തിലാണ് വീണ്ടും സമരത്തിലേക്ക് കടക്കുന്നത്. ബജറ്റില് കെ എസ് ആര് ടി സിക്ക് തുകവകയിരുത്തിയപ്പോഴും സ്വകാര്യ ബസ് മേഖലയെ അവഗണിച്ചതിലും ബസുടമകള്ക്ക് അമര്ഷമുണ്ട്. സംസ്ഥാനത്ത് നിലവില് സര്വീസ് നടത്തുന്ന എണ്ണായിരത്തോം ബസുകളാണ് പണിമുടക്കില് പങ്കെടുക്കുന്നത്. ഒന്നു മുതല് 9 വരെ ക്ലാസുകളിലെ വാര്ഷിക പരീക്ഷ തുടങ്ങിയതിനാല് സമരം വിദ്യാര്ഥികളെയും ബാധിക്കും. ഈ മാസം 30 ന് എല്ഡിഎഫ് യോഗത്തിന് ശേഷം മാത്രമേ നിരക്ക് വര്ധനയില് തീരുമാനമുണ്ടാകൂ എന്നാണ് സര്ക്കാര് വൃത്തങ്ങള് അറിയിക്കുന്നത്.
