പത്തനംതിട്ട : പ്രൈവറ്റ് ബസ് ഓപ്പറേറ്റേഴ്സ് അസോസിയേഷന്റെ നേതൃത്വത്തില് ജൂലൈ 8 ബുധനാഴ്ച ജില്ലയിലെ സ്വകാര്യ ബസുകള് പണിമുടക്കും. കെ.എസ്.ആര്.റ്റി.സി യിലെ പ്രിയദര്ശിനി സൗജന്യയാത്ര മൂലം സ്വകാര്യ ബസ് മേഖല വലിയ തകര്ച്ച നേരിടുകയാണ്. പദ്ധതി നടപ്പാക്കി മൂന്നാഴ്ച പിന്നിടുമ്പോഴും സര്ക്കാര് ഇതുവരെ പ്രതിസന്ധിക്ക് അയവ് വരുത്താത്തതില് പ്രതിഷേധിച്ചാണ് പണിമുടക്ക് നടത്തുന്നതെന്ന് ബസുടമകള് അറിയിച്ചു. പണിമുടക്കിന്റെ ഭാഗമായി ബസുടമകളും ജീവനക്കാരും പത്തനംതിട്ട കളക്ട്രേറ്റിലേക്ക് മാര്ച്ചും ധര്ണ്ണയും നടത്തും. രാവിലെ 10 മണിക്ക് നഗരസഭാ സ്വകാര്യ ബസ് സ്റ്റാന്റില് നിന്നും മാര്ച്ച് ആരംഭിക്കും.
പണിമുടക്കുമായി ബന്ധപ്പെട്ട് സംയുക്ത ട്രേഡ് യൂണിയനുകളുടെയും ബസ് ഉടമ സംഘടനകളുടെയും ആലോചന യോഗം പ്രൈവറ്റ് ബസ് ഓപ്പറേറ്റേഴ്സ് അസോസിയേഷന് ജില്ലാ സെക്രട്ടറി ലാലു മാത്യുവിന്റെ അധ്യക്ഷതയില് ചേര്ന്നിരുന്നു. പ്രിയദര്ശിനി പദ്ധതി നടപ്പാക്കിയ ശേഷം സ്ത്രീകള് സ്വകാര്യ ബസില് കയറാതെ വന്നതോടെ മൂവായിരം രൂപയുടെ വരുമാന നഷ്ടമാണ് ജില്ലയിലെ ഓരോ സ്വകാര്യ ബസ്സിനും പ്രതിദിനം ഉണ്ടായിക്കൊണ്ടിരിക്കുന്നതെന്ന് ബസുടമകള് പറയുന്നു. ജീവനക്കാര്ക്ക് ശമ്പളം കൊടുക്കാന് കഴിയാതെ വന്നതോടെ ബസ് ഉടമകള് തന്നെ കണ്ടക്ടറും ഡ്രൈവറുമായി ജോലി ചെയ്യേണ്ടി വന്ന സാഹചര്യവും സംജാതമായി.
