പന്തളം : പന്തളം വലിയ പാലത്തില് നിന്നും നദിയിലേക്ക് ചാടി ആത്മഹത്യ ചെയ്യാന് ശ്രമിച്ച മധ്യ വയസ്കനെ നാട്ടുകാരുടെ സമയോചിതമായ ഇടപെടലിലൂടെ രക്ഷപെടുത്തി. രാവിലെ 11 മണിയോടെയാണ് പന്തളം കുരമ്പാല സ്വദേശി ആല്ത്തറ വീട്ടില് രവി (57) പന്തളം വലിയ പാലത്തില് നിന്നും നദിയിലേക്ക് ചാടിയത്. വാഹനത്തിലെത്തിയ ഇയാള് പാലത്തില് വാഹനം നിര്ത്തിയിട്ട ശേഷം നദിയിലേക്ക് ചാടുകയായിരുന്നു. നദിയില് ശക്തമായ ഒഴുക്കുണ്ടായിരുന്നതിനാല് ഇയാള് നദിയുടെ മധ്യഭാഗത്ത് കൂടി ഒഴുകി പോവുകയും ചെയ്തു.
രവി നദിയിലേക്ക് ചാടുന്നതും ഒഴുകി പോകുന്നതും കണ്ട നാട്ടുകാരില് ചിലര് നിലവിളിച്ചതിനെ തുടര്ന്ന് ഓടിയെത്തിയ ദീപു, വിനീഷ്, ശങ്കര് എന്നീ യുവാക്കള് മറ്റൊന്നും ആലോചിക്കാതെ നദിയിലേക്ക് എടുത്ത് ചാടുകയും ഇയാളെ രക്ഷപെടുത്തി കരയില് എത്തിക്കുകയുമായിരുന്നു. കയത്തിന്റെ ഭാഗത്തേക്ക് രവി ഒഴുകി പോകാതിരുന്നതിനാല് ജീവന് രക്ഷിക്കാന് യുവാക്കള്ക്ക് സാധിച്ചു. പിന്നീട് പന്തളം പോലീസില് നാട്ടുകാര് വിവരം ധരിപ്പിക്കുകയും സ്ഥലത്തെത്തിയ പോലീസ് രവിയെ പോലീസ് സ്റ്റേഷനിലേക്ക് മാറ്റുകയും ചെയ്തു. കടുത്ത മാനസിക വിഷമത്തെ തുടര്ന്നാണ് താന് ആത്മഹത്യക്ക് ശ്രമിച്ചതെന്നും രവി പോലീസിനോട് പറഞ്ഞു. ഇയാള് പാലത്തില് നിര്ത്തിയിട്ടിരുന്ന വാഹനം പോലീസ് സ്ഥലത്ത് നിന്നും മാറ്റി.
