ന്യൂഡല്ഹി : വനിതാ ഹോസ്റ്റലില് താമസിക്കുന്ന പെണ്കുട്ടികളുടെ സ്വകാര്യദൃശ്യങ്ങള് സാമൂഹികമാധ്യമങ്ങളില് പ്രചരിച്ചെന്ന പരാതിക്ക് പിന്നാലെ ചണ്ഡീഗഢ് സര്വകലാശാലയില് വിദ്യാര്ഥികളുടെ പ്രതിഷേധം. കഴിഞ്ഞദിവസം രാത്രിയാണ് വിദ്യാര്ഥികള് പ്രതിഷേധവുമായി രംഗത്തിറങ്ങിയത്. ക്യാമ്പസില് തടിച്ചുകൂടിയ വിദ്യാര്ഥികളെ ഒടുവില് പോലീസെത്തിയാണ് ശാന്തരാക്കിയത്. കേസില് ഹോസ്റ്റലിലെ അന്തേവാസിയായ ഒരു പെണ്കുട്ടിയെ ചോദ്യംചെയ്തുവരികയാണെന്നും പോലീസ് അറിയിച്ചു.
ഹോസ്റ്റലില് തന്നെ താമസിക്കുന്ന ഒരു പെണ്കുട്ടിയാണ് ദൃശ്യങ്ങള് പ്രച്ചരിപ്പിച്ചതെന്ന് മറ്റു പെണ്കുട്ടികളുടെ പരാതിയെത്തുടര്ന്ന് പ്രതിയെന്ന് സംശയിക്കുന്ന പെണ്കുട്ടിയെ കസ്റ്റഡിയിലെടുത്ത് ചോദ്യംചെയ്യുന്നതെന്നും മൊഹാലി പോലീസ് പറഞ്ഞു. പ്രതിഷേധങ്ങളുടെ വീഡിയോ സാമുഹ മാധ്യമങ്ങളിലൂടെ പുറത്തു വരുന്നുണ്ട്. പ്രതിഷേധത്തിനിടെ ഒരു പെണ്കുട്ടി കുഴഞ്ഞുവീണെന്നും ഇതിന്റെ ദൃശ്യങ്ങളാണ് സാമൂഹികമാധ്യമങ്ങളില് പ്രചരിക്കുന്നതെന്നും മറ്റുപ്രചാരണങ്ങള് അടിസ്ഥാനരഹിതമാണെന്നും സര്വകലാശാല അധികൃതര് അറിയിച്ചു.
സ്വകാര്യദൃശ്യങ്ങള് പുറത്തായെന്ന പരാതിയില് മൊഹാലി പോലീസും സൈബര് ക്രൈംബ്രാഞ്ചുമാണ് കേസെടുത്ത് അന്വേഷണം നടത്തുന്നത്. സംഭവത്തില് കുറ്റവാളികളായവര് രക്ഷപ്പെടില്ലെന്നും ചണ്ഡീഗഢ് സര്വകലാശാലയിലെ വിദ്യാര്ഥികള് സമാധാനം പാലിക്കണമെന്നും പഞ്ചാബ് വിദ്യാഭ്യാസ മന്ത്രി ഹര്ജോത് സിങ് ബെയിന്സ് ട്വീറ്റ് ചെയ്തു. ഇത് നമ്മുടെ സഹോദരിമാരുടെയും പെണ്മക്കളുടെയും അന്തസ്സുമായി ബന്ധപ്പെട്ട ഏറെ സെന്സിറ്റീവായ വിഷയമാണ്. മാധ്യമങ്ങളടക്കം നമ്മള് എല്ലാവരും ജാഗ്രത പാലിക്കണം. ഇത് ഒരു സമൂഹമെന്ന നിലയില് നമുക്കുള്ള പരീക്ഷണമാണെന്നും അദ്ദേഹം ട്വീറ്ററില് കുറിച്ചു.
