കൊച്ചി: മുഖ്യമന്ത്രി പിണറായി വിജയന്റെ പ്രൈവറ്റ് സെക്രട്ടറി കെ.കെ.രാഗേഷിന്റെ ഭാര്യ ഡോ. പ്രിയ വര്ഗീസിനെ കണ്ണൂര് സര്വകലാശാല മലയാളം അസോഷ്യേറ്റ് പ്രഫസര് തസ്തികയിലേക്ക് നിയമിച്ച നടപടി ഹൈക്കോടതി സ്റ്റേ ചെയ്തു. ഹര്ജിയില് കഴമ്പുണ്ടെന്ന് നിരീക്ഷിച്ച കോടതി, കേസില് യുജിസിയെ കക്ഷി ചേര്ക്കാനും ഉത്തരവിട്ടു. പ്രിയ വര്ഗീസ് ഒന്നാമതെത്തിയ റാങ്ക് ലിസ്റ്റില്നിന്നുള്ള നിയമനം കോടതി തടയുകയും ചെയ്തു.
പ്രിയ വര്ഗീസിനെ നിയമന പട്ടികയില്നിന്ന് ഒഴിവാക്കണമെന്ന് ആവശ്യപ്പെട്ട് നിയമന പട്ടികയില് രണ്ടാമതുള്ള ഡോ. ജോസഫ് സ്കറിയനല്കിയ ഹര്ജിയിലാണ് നടപടി. പ്രിയ വര്ഗീസിന് അഭിമുഖത്തില് കൂടുതല് മാര്ക്ക് ലഭിച്ചപ്പോഴാണ് ജോസഫ് സ്കറിയ പട്ടികയില് രണ്ടാമതായത്.അസോഷ്യേറ്റ് പ്രഫസര് നിയമനത്തിനു പരിഗണിച്ച 6 പേരില് റിസര്ച് സ്കോറില് ഏറ്റവും പിന്നിലായിരുന്നു പ്രിയ വര്ഗീസ്. റിസര്ച് സ്കോറില് 651 മാര്ക്കോടെ ഒന്നാമനായിരുന്ന ജോസഫ് സ്കറിയയെ 156 മാര്ക്കു മാത്രമുണ്ടായിരുന്ന പ്രിയ വര്ഗീസ് അഭിമുഖം കഴിഞ്ഞപ്പോള് രണ്ടാമനാക്കി മാറ്റി ഒന്നാം സ്ഥാനത്തെത്തി. പ്രിയയ്ക്ക് അഭിമുഖത്തില് മാര്ക്ക് 32, ജോസഫ് സ്കറിയയ്ക്ക് 30. പ്രിയ വര്ഗീസിന് ഒന്നാം റാങ്ക് നല്കിയത് വിവാദമായതിനു പിന്നാലെ അസോഷ്യേറ്റ് പ്രഫസര് നിയമന നടപടികള് ഗവര്ണര് ആരിഫ് മുഹമ്മദ് ഖാന് മരവിപ്പിച്ചിരുന്നു.
