പത്തനംതിട്ട : ഇന്ത്യയെ ഒന്നിപ്പിക്കുക എന്ന മുദ്രാവാക്യം ഉയർത്തി കോൺഗ്രസ് നേതാവ് രാഹുൽ ഗാന്ധി കാശ്മീർ മുതൽ കന്യാകുമാരി വരെ നയിക്കുന്ന ഭാരത് ജോഡോ യാത്ര ചരിത്ര സംഭവമായി മാറുമെന്ന് ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ പറഞ്ഞു. ഭാരത് ജോഡോ യാത്രയുടെ കോന്നി നിയോജക മണ്ഡലത്തിലെ ഒരുക്കങ്ങൾക്കായി ചേർന്ന കോൺഗ്രസ് നേതൃ സംഗമം ഉദ്ഘാടനം ചെയ്ത് സംസാരിക്കുയായിരുന്നു അദ്ദേഹം. രാജ്യത്തെ ഭിന്നിപ്പിക്കുവാനും മതേതര ഇന്ത്യയുടെ ആത്മാവ് തകർക്കുവാനും ശ്രമിക്കുന്ന സംഘപരിവാർ നിയന്ത്രണത്തിലുള ജനവിരുദ്ധ സർക്കാരിനെതിരായ താക്കീതായി യാത്ര മാറുമെന്ന് ഡി.സി.സി പ്രസിഡന്റ് പറഞ്ഞു.
ഭാരത് ജോഡോ യാത്രയുടെ നിയോജക മണ്ഡലം കോഓഡിനേറ്റർ സജി കൊട്ടയ്ക്കാട് അധ്യക്ഷത വഹിച്ചു. ജില്ലാ കോഓഡിനേറ്റർ ബാബു ജോർജ്, കെപിസിസി അംഗം മാത്യു കുളത്തിങ്കൽ, ഡിസിസി ഭാരവാഹികളായ റോബിൻ പീറ്റർ, വെട്ടൂർ ജ്യോതിപ്രസാദ്, സാമുവൽ കിഴക്കുപുറം, ചിറ്റൂർ ശങ്കർ, ഹരികുമാർ പൂതങ്കര, എം.വി.ഫിലിപ്പ്, എസ്.വി.പ്രസന്നകുമാർ, എലിസബേത്ത് അബു, കോൺഗ്രസ് ബ്ലോക്ക് പ്രസിഡന്റുമാരായ എസ്.സന്തോഷ്കുമാർ, ആർ.ദേവകുമാർ എന്നിവർ പ്രസംഗിച്ചു. ഭാരത് ജോഡോ യാത്രയോട് അനുബന്ധിച്ച് ബൂത്ത് കമ്മിറ്റികളുടെ നേതൃത്വത്തിൽ ഭവന സന്ദർശനം നടത്തുന്നതിനും ബ്ലോക്ക് മണ്ഡലം തലത്തിൽ വിളംബര ജാഥകൾ സംഘടിപ്പിക്കുന്നതിനും യോഗം തീരുമാനിച്ചു.
