കൊച്ചി : തെച്ചിക്കോട്ടുകാവ് രാമചന്ദ്രനെ പൊതുസ്ഥലത്ത് എഴുന്നള്ളിക്കുന്നത് വിലക്കി ഹൈക്കോടതി. മൃഗങ്ങള്ക്കെതിരെയുള്ള ക്രൂരത തടയുകയെന്ന ലക്ഷ്യത്തോടെ രൂപീകരിച്ച എസിപിസിഎ സംഘടന സമര്പ്പിച്ച പുനഃപരിശോധന ഹര്ജിയിലാണ് ഉത്തരവ്. ജസ്റ്റിസുമാരായ മുഹമ്മദ് മുസ്താഖ്, അനു ശിവരാമന് എന്നിവരടങ്ങിയ ഡിവിഷന് ബെഞ്ചിന്റേതാണ് ഇടക്കാല ഉത്തരവ്. തെച്ചിക്കോട്ടുകാവ് രാമചന്ദ്രനെ പൊതുസ്ഥലത്ത് എഴുന്നള്ളിക്കുന്നത് വിലക്കണമെന്ന അസിസ്റ്റന്റ് ഫോറസ്റ്റ് കണ്സര്വേറ്ററുടെ റിപ്പോര്ട്ട് കോടതി പരിഗണിച്ചു. ആനയുടെ ഒരു കണ്ണിന്റെ കാഴ്ചശക്തി പൂര്ണമായും നഷ്ടപ്പെട്ടിട്ടുണ്ടെന്ന് മെഡിക്കല് സംഘം റിപ്പോര്ട്ട് നല്കിയിരുന്നു. ഇക്കാര്യത്തില് ആറാഴ്ചയ്ക്കകം നിലപാട് അറിയിക്കാന് തെച്ചിക്കോട്ടുകാവ് ദേവസ്വത്തിന് കോടതി നിര്ദേശം നല്കി.
