തിരുവനന്തപുരം: കോണ്ഗ്രസ് സ്ഥാനാര്ഥി പട്ടികയില് പ്രതിഷേധിച്ച് മഹിള കോണ്ഗ്രസ് അധ്യക്ഷ സ്ഥാനം ലതിക സുഭാഷ് രാജിവെച്ചു. സ്ഥാനാര്ഥി പട്ടികയില് സ്ത്രീകളെ അവഗണിച്ചെന്ന് ചൂണ്ടിക്കാട്ടി രാജിക്ക് പിന്നാലെ കെ.പി.സി.സി ഓഫിസിന് മുന്നില് ലതിക സുഭാഷ് തലമുണ്ഡനം ചെയ്തു.
മഹിളാ കോണ്ഗ്രസ് മൊത്തം സ്ഥാനാര്ഥികളില് 20 ശതമാനം സ്ത്രീകള്ക്ക് നീക്കിവെക്കണമെന്ന് ആവശ്യപ്പെട്ടിരുന്നുവെങ്കിലും പാര്ട്ടിക്ക് വേണ്ടി പണിയെടുക്കുന്ന സ്ത്രീകളെ അവഗണിച്ചുവെന്നും ലതിക സുഭാഷ് മാധ്യമങ്ങളോട് പറഞ്ഞു.
നിരവധി സ്ത്രീകള് കാലങ്ങളായി മഹിളാ കോണ്ഗ്രസിന് വേണ്ടി പണിയെടുക്കുന്നുണ്ട്. മഹിളാ കോണ്ഗ്രസ് മുന് സെക്രട്ടറി രമണി പി നായരുള്പ്പെടെയുള്ളവര് തഴയപ്പെട്ടിട്ടുണ്ട്. അന് സജിതയുടെ പേര് വന്നതില് സന്തോഷമുണ്ട്. ഏറ്റുമാനൂര് കോണ്ഗ്രസ് ഏറ്റെടുത്താല് മത്സരിക്കാനായി ലതികാ സുഭാഷിന്റെ പേരും പരിഗണനയില് ഉണ്ടായിരുന്നു. എന്നാല് ആ സീറ്റ് കേരള കോണ്ഗ്രസിന് നല്കിയതില് ലതികാ സുഭാഷ് ഉമ്മന്ചാണ്ടിയോട് എതിര്പ്പ് അറിയിച്ചിരുന്നു.
എന്നാല് തനിക്ക് ജയസാധ്യത ഉണ്ടായിരുന്ന മണ്ഡലത്തില് നീക്കുപോക്ക് ആകാമായിരുന്നുവെന്ന് ലതികാ സുഭാഷ് കഴിഞ്ഞ ദിവസം ഉമ്മന് ചാണ്ടിയോട് പറഞ്ഞിരുന്നു. സ്ഥാനാര്ത്ഥി പട്ടിക വന്ന ശേഷം കൂടുതല് പ്രതികരിക്കുമെന്നും ലതിക സുഭാഷ് പറഞ്ഞിരുന്നു.
അതേ സമയം ലതിക സുഭാഷിനെ അവഗണിച്ചില്ലെന്ന് കെ.പി.സി.സി അധ്യക്ഷന് മുല്ലപ്പള്ളി രാമചന്ദ്രന്. സീറ്റ് ലഭിക്കാത്തതില് ഒരാള് തലമുണ്ഡനം ചെയ്യാന് തയ്യാറാവില്ലെന്നും പിന്നില് മറ്റെന്തെങ്കിലും കാരണങ്ങളുണ്ടാവുമെന്നും മുല്ലപ്പള്ളി പറഞ്ഞു.
